Saılaý naýqanynyń úgit kezeńi bastalmaı jatyp nasıhat júrgizgender jaýapqa tartyldy

ASTANA. QazAqparat – Májilis pen máslıhat depýtattarynyń saılaý naýqanynda úgit jumystaryna ruqsat berilmeı jatyp, nasıhatpen aınalysqandar jaýapqa tartyldy. Bul týraly Ortalyq saılaý komıssııasynyń otyrysyna qatysqan Bas prokýrordyń orynbasary Jandos Ómirálıev málim etti, dep habarlaıdy QazAqparat tilshisi.

«Búgingi tańda saılaý boıynsha qoǵamdyq pikirge saýalnama júrgizýdiń, sondaı-aq saılaý aldyndaǵy úgitti júrgizýdiń belgilengen tártibi men sharttaryn saqtamaýmen ushtasqan birqatar zań buzýshylyqtar tirkeldi. Olardyń bireýi elordada bolǵan. Kináli adamǵa Astana qalasy Saryarqa aýdany prokýrorynyń qaýlysymen qysqartylǵan is júrgizý tártibinde Ákimshilik quqyq buzýshylyq týraly Kodekstiń 120-baby 3-bóligi boıynsha 7,5 AEK mólsherinde ákimshilik aıyppul salyndy», - dedi Jandos Ómirálıev.

Buǵan qosa, kandıdattar men partııalyq tizimderdi tirkeý aıaqtalǵanǵa deıin úgit júrgizgen 5 zań buzýshylyq faktisi anyqtalǵanyn atap ótti.

«Bireýi boıynsha Taldyqorǵan qalasynyń turǵyny WhatsApp messendjerinde úgit júrgizgeni úshin sot qaýlysymen aıyppul túrinde ákimshilik jazaǵa tartyldy. Qalǵandary boıynsha kinálilerdi osy bappen jaýapqa tartý jónindegi sharalar qabyldanyp jatyr», - dep toqtaldy Bas prokýrordyń orynbasary.

Ol anyqtalǵan zań buzýshylyq faktileri boıynsha tıisti zańnamada kózdelgen quqyqtyq sharalar qabyldanatynyn eskertti.