Saılaý naýqany koronavırýs juqtyrǵandardyń kóbeıýine áser etken joq - DSM

NUR-SULTAN. QazAqparat – QR Densaýlyq saqtaý birinshi vıtse-mınıstri Marat Shoranov «Nelikten saılaýdan keıin COVID-19 shaldyqqandar sany artty?» degen suraqqa jaýap berdi, dep habarlaıdy QazAqparat tilshisi.

«Koronavırýs naýqastarynyń sany 15 qańtardan keıin kóbeıe bastady. Al bizdegi saılaý 10 qańtarda ótti. Inkýbatsııalyq kezeńine qarasaq, 5 kún ishindegi kóbeıý saılaýǵa baılanysty bola almaıdy. Jalpy bul ósim negizi uzaq jańajyldyq merekelerge baılanysty. Jyl aıaǵynda osy alańda áleýmettik qashyqtyq saqtap, betperde taǵýdy, jańa jyldy tek otbasymen qarsy alýdy eskertken edik. Qazirgi jaǵdaı sol erejelerdiń saqtalmaýynan dep sanaımyz. Ózderińiz kórgendeı, keı óńirlerde jaǵdaı qıyndap jatyr. Biraq, bári bizdiń baqylaýda, ákimdiktermen turaqty túrde karantın sharalaryn kúsheıtip jatyrmyz», - dep jaýap berdi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda .

Aıta keteıik, 27 qańtardaǵy jaǵdaıǵa sáıkes, Qazaqstan Respýblıkasynda 181 117 adamda KVI+ jáne 47 575 adamda KVI- anyqtaldy. KVI+ boıynsha 163 156 adam jáne KVI- 35 348 adam jazylyp shyqqan. Juqpaly aýrýlar aýrýhanasyndaǵy tósek-orynnyń 31% (6 492 oryn) tolǵan, al jansaqtaý bóliminiń 20%-ynda 374 adam hal ústinde jatyr.