Saılaý naýqany qatań túrde zańǵa sáıkes ótetinine kepildik beremin - Toqaev

ASTANA. QazAqparat - Qasym-Jomart Toqaev aldaǵy prezıdent saılaýynyń ádil ótetinine kepildik berdi, dep habarlaıdy QazAqparat.

Aıta keteıik, Qazaqstanda kelesi prezıdent saılaýy 20 qarashada ótetin boldy.

Osyǵan baılanysty búgin Memleket basshysy Qazaqstan halqyna úndeý jasady.

Onda Prezıdent bıylǵy jyl jan-jaqty reformalar men naqty ózgerister jylyna aınalǵanyn sóz etken.

«Memleket basshysy retinde saılaý naýqany qatań túrde zańǵa sáıkes ótetinine kepildik beremin. Ony otandyq jáne sheteldik baıqaýshylardyń qatysýymen ádil ári ashyq ótkizetin bolamyz. Barsha azamattarymyzdy jaýapkershiligin sezinip, demokratııa, zań jáne tártip qaǵıdattaryn berik ustanýǵa shaqyramyn. Elimizdiń birligi men tutastyǵyn kórsete bileıik. Halqymyzdyń taǵdyry, Qazaqstannyń bolashaǵy árqaısymyzdyń qolymyzda. Biz Ádiletti Qazaqstandy birge quramyz!» delingen úndeýde.