Saılaý naýqany barysynda azamattar men zańdy tulǵalar tarapynan 44 aryz-shaǵym tústi - Bas prokýratýra
ASTANA. 29 jeltoqsan. QazAqparat /Qanat Mámetqazyuly/ - Saılaý naýqanynyń búgingi deıingi kezeńi barysynda memlekettik organdarǵa azamattar men zańdy tulǵalar tarapynan QR Parlamenti Májilisine depýtattar saılaýǵa qatysty 44 aryz-shaǵym kelip tústi.
Onyń 23-i prokýratýra organdaryna baǵyttalsa, 21-i saılaý komıssııalaryna joldanǵan. Bul týraly búgin QR Bas prokýratýrasynda ótken baspasóz máslıhatynda Bas prokýror orynbasary Andreı Kravchenko málim etti.
A. Kravchenkonyń aıtýynsha, máslıhattar saılaýyna qatysty 60 aryz-shaǵym túsken. Onyń 41-i - prokýratýra organdaryna, 18-i - saılaý komıssııalaryna, 1-eýi - máslıhattarǵa.
«Jalpy kelip túsken 104 shaǵymnyń 27-isi saılaý zańnamasyn túsindirý jóninde, 13-i laýazymdy tulǵalardyń áreketine (partııalyq tizimge engizbeý, polıtsııa qyzmetkerleriniń áreketi), 11-i saılaý komıssııalarynyń sheshimi men áreketterine, 13-i saılaýaldy úgitti júrgizý tártibiniń buzylǵandyǵyna, 15-i kandıdattardy usynýǵa kelispeýge qatysty bolyp tabylady», - dedi A. Kravchenko.
Onyń aıtýynsha, Bas prokýratýranyń úılestirý róli boıynsha quqyq qorǵaý organdarymen aldaǵy saılaýdyń barlyq kezeńderiniń zańdylyǵyn qamtamasyz etýge baǵyttalǵan sharalar kesheni qabyldanǵan. «Bas prokýratýrada saılaý zańnamasynyń qoldanylýyn qadaǵalaýdy qamtamasyz etý jónindegi jedel shtab quryldy», - dedi Bas prokýrordyń orynbasary.
