Saılaý naýqanyndaǵy báseke kúsheıdi: partııalar arasyndaǵy alǵashqy ashyq pikirtalastar
ASTANA. KAZINFORM - Qazirgi saılaýaldy naýqan alǵashqy kúnderden-aq burynǵylardan aıtarlyqtaı erekshelenip otyr. Buryn úgit kezeńi kóbine resmı kezdesýler men baǵdarlamalardy tanystyrýmen shektelse, búginde partııalar áleýmettik jelilerdi belsendi ıgerip, dástúrli emes ashyq formattardy paıdalanyp, básekelesterimen ashyq pikirtalasqa túsip jatyr.
Úgit-nasıhat naýqanynyń alǵashqy aptasynyń sońyna qaraı partııalar óz baǵdarlamalaryn tanystyrý kezeńinen saılaýshylardyń nazaryn aýdarý jolyndaǵy neǵurlym belsendi básekege kóshýde. Saılaýaldy naýqan qarqyndy ári mazmundy sıpat ala bastady.
«Ádilet» partııasy birqatar jarııa is-shara ótkizdi. Túrkistanda kásipkerlermen, agrarshylarmen jáne túrli sala ókilderimen kezdesýlerden keıin partııa kontserttik baǵdarlama men dron-shoý qamtylǵan keshki Open Air uıymdastyrdy. Іs-sharalar barysynda dene shynyqtyrý jáne sport salasyna qatysty máseleler de kóterildi.
Jalpyulttyq sotsıal-demokratııalyq partııa (JSDP) saraptamalyq pikirtalasqa basymdyq berip, sonymen birge básekelesteriniń baǵdarlamalaryn ashyq synǵa alǵan alǵashqy partııalardyń biri boldy. Dóńgelek ústelde partııa ókilderi birqatar partııa baǵdarlamalarynyń jekelegen erejelerin synǵa alyp, blogerler men shoý-bıznes ókilderin partııalyq tizimderge engizý máselesine qatysty pikir bildirdi. Budan bólek, partııa skandınavııalyq júris boıynsha respýblıkalyq sporttyq aktsııa ótkizdi. Aktsııa el óńirlerinde jalǵasady.
«Baıtaq» jasyldar partııasy óz naýqanyn ekologııalyq kún tártibi tóńireginde júrgizýdi jalǵastyrýda. Marafonnan bólek, partııa erekshe qorǵalatyn tabıǵı aýmaqtar júıesin damytýǵa, bıoalýantúrlilikti saqtaýǵa jáne tabıǵat qorǵaý zańnamasyn jetildirýge arnalǵan saraptamalyq alań qurýǵa bastamashylyq etti. Osylaısha, partııa óziniń beıindi taqyrybyna berik ekenin kórsetti.
Qazaqstan Halyq partııasy (QHP) eńbek ujymdarymen kezdesýler barysynda básekelesterdiń jekelegen usynystaryn synǵa aldy. Atap aıtqanda, partııa ókilderi áleýmettik mańyzy bar azyq-túlik taýarlarynyń baǵasyn memlekettik retteýdi joıý jónindegi bastamalarǵa qarsy shyǵyp, JSDP baǵdarlamasynyń áleýmettik saıasat salasyndaǵy jekelegen erejelerin de synǵa aldy.
«Aýyl» partııasy dástúrli qundylyqtar men halyqpen tikeleı dıalogqa basymdyq berýdi jalǵastyrýda. Respýblıkalyq shtabyn ashqannan keıin partııa óńirlerde brendtelgen kıiz úıler ornata bastady. Sonymen qatar partııa ókilderi áleýmettik jelilerdegi tikeleı efırlerdi belsendi paıdalanyp, azamattardyń suraqtaryna jaýap berip qana qoımaı, partııalyq tizimderdiń quramy men kadr saıasatyn synaı otyryp, básekelesterimen ashyq pikirtalasqa túsýde.
Naýqannyń úshinshi kúnindegi eń eleýli oqıǵalardyń biri «Aq jol» men Respublica partııalary arasyndaǵy ózara pikirtalas boldy. «Aq jol» ókilderi Respublica baǵdarlamasynyń jekelegen tezısteri partııa ókilderiniń is-áreketterine qanshalyqty sáıkes keletinine kúmán keltirip, málimdelgen qaǵıdattar men partııanyń keıbir músheleriniń qoǵam aldyndaǵy beınesi arasyndaǵy qaıshylyqtardy kórsetti. Buǵan jaýap retinde Respublica «Aq joldyń» ónerkásiptik saıasat salasyndaǵy usynystaryn jetkilikti pysyqtalmaǵan ári sybaılas jemqorlyq táýekelderin qamtıdy dep synap, sonymen qatar otandyq óndiristi damytý jónindegi óz kózqarasyn usyndy. Osylaısha, qazirgi ýaqytta osy eki partııa arasynda eń eleýli ashyq baǵdarlamalyq pikirtalas qalyptasty.
Jalpy, úgit naýqanynyń úshinshi kúni saılaý naýqanynyń neǵurlym qarqyndy kezeńge ótkenin kórsetedi. Partııalar dástúrli emes kommýnıkatsııa formattaryn barǵan saıyn belsendi paıdalanyp, tanymal saıası beıne qalyptastyrýǵa umtylyp, básekelesterimen mazmundy pikirtalasqa túsýde. Nátıjesinde saılaýaldy naýqan mazmundy ári básekeli bola túsýde.
Aıta keteıik, osyǵan deıin partııalardyń bıýlletende ornalasý reti anyqtalǵan bolatyn.
7 saıası partııa saılaýaldy shtabyn ashty.
