Saılaý naýqany bastalǵannan beri zańnamany buzýdyń 21 faktisi anyqtaldy
ASTANA. KAZINFORM – Quryltaı depýtattaryn saılaý naýqanyna oraı úgit bastalǵan sátten zańnamany buzýdyń 21 faktisi anyqtaldy. Bul týraly Ortalyq saılaý komıssııasynyń otyrysynda Mádenıet jáne aqparat birinshi vıtse-mınıstri Qanat Ysqaqov aıtty.
- Mınıstrlik aqparattyq keńistikke turaqty monıtorıng júrgizedi. Monıtorıng qorytyndysy boıynsha úgit-nasıhat naýqany kezinde buqaralyq aqparat quraldarynda saıası partııalardyń saılaý shtabtarynyń qyzmetine qatysty 7 myńnan astam materıal jaryq kórdi. Onyń ishinde telearnalarda 3 myńǵa jýyq, baspa basylymdarda 500-den astam jáne ınternet keńistiginde, ıaǵnı ınternet-resýrstarda 4,5 myńǵa jýyq materıal jaryq kórdi, - dedi birinshi vıtse-mınıstr.
Onyń aıtýynsha, buqaralyq aqparat quraldaryna ornalastyrylatyn materıaldardyń eki túri zańmen aıqyndalǵan. Birinshisi — saılaý shtabtarynyń saılaý qorlarynyń qarajaty esebinen aqyly negizde ornalastyratyn úgit-nasıhat materıaldary. Ekinshisi — buqaralyq aqparat quraldarynyń jańalyqtar men taldamalyq baǵdarlamalar aıasynda telearnalarda, baspa basylymdarynda jáne ınternet-resýrstarda jarııalaıtyn shtabtardyń qyzmeti týraly aqparattyq materıaldar.
- Jalpy, monıtorıng nátıjesi boıynsha BAQ-ta aqparatty teń dárejede jarııalaý qaǵıdaty saqtaldy, saqtalyp ta jatyr dep aıtýǵa tolyq negiz bar. Úgit naýqany bastalǵannan beri mınıstrlik saılaý zańnamasyn buzýdyń 21 faktisin anyqtady. Basym bóligi ókinishke oraı, qoǵamdyq pikir saýalnamasy nátıjelerin jarııalaýǵa tyıym salynǵan kezde osyndaı saýalnamalar nátıjesi qamtylǵan materıal ornalastyrýǵa baılanysty boldy. Demek, áleýmettik saýalnamalardy áli de durys júrgizip jatqan joqpyz, - dedi Qanat Ysqaqov.
Buǵan deıin 23 tamyzda ótetin Quryltaı depýtattary saılaýyna saılaý ýchaskeleri daıyn ekenin jazǵan edik.
