Saılaý naýqany bastalǵaly OSK-ǵa 203 ótinish kelip tústi
ASTANA. KAZINFORM – Quryltaı depýtattaryn saılaý naýqany bastalǵan sátten beri Ortalyq saılaý komıssııasyna 203 ótinish tústi. Bul týraly komıssııa múshesi Ásel Janábilova aıtty.
Búgin komıssııa otyrysynda ol Quryltaı depýtattaryn saılaý taǵaıyndalǵan sátten bastap Ortalyq saılaý komıssııasyna 203 ótinish kelip túsken, onyń ishinde 129 ótinish - saılaý zańnamasyn túsindirýge, 62 ótinish saılaý protsesin uıymdastyrý máselelerine baılanysty bolǵanyn aıtty. Komıssııa múshesiniń atap ótýinshe, árbir ótinish ýaqytyly qaralyp, jan-jaqty jaýap berildi. OSK-ǵa aýmaqtyq saılaý komıssııalarynyń sheshimderi men áreketterine qatysty shaǵymdar túspedi.
- Árbir ótinish belgilengen tártippen qaralyp, azamattarǵa zańnama talaptaryn eskere otyryp, naqty túsindirmeler beriledi. Bul rette saılaý zańnamasyn buzǵany úshin jaýapkershilik kózdelgenin túsiný mańyzdy. Bizdiń ortaq mindetimiz - saılaý naýqanynyń barlyq kezeńderinde zańdylyqtyń saqtalýyn qamtamasyz etý jáne azamattardyń saılaý quqyqtaryn qorǵaý, – dedi Ásel Janábilova.
Osy rette OSK múshesi saılaý komıssııalarynyń jumysyna aralasqany, daýys berý qupııasyn buzǵany, azamattardyń erkin erik bildirýine kedergi keltirgeni, sondaı-aq basqa adamdar úshin daýys berý maqsatynda azamattarǵa saılaý bıýlletenderin bergeni úshin jaýapkershilik kózdelgenin eske saldy. Sonymen qatar saılaý komıssııalary músheleriniń, saıası partııalardyń senim bildirilgen ókilderiniń, buqaralyq aqparat quraldary ókilderi men baıqaýshylardyń zańdy qyzmetine kedergi keltirgeni úshin de jaýapkershilik qarastyrylǵan.
Buǵan deıin 23 tamyzda ótetin Quryltaı depýtattaryn saılaýyna saılaý ýchaskeleri daıyn ekenin jazǵan edik.
