Saılaý nátıjesi - meniń el basshylyǵynda júrip ótken joldaryma berilgen zor baǵa - Elbasy
ASTANA. QazAqparat - Keshegi saılaý nátıjesi meniń el basshylyǵynda júrip ótken joldaryma berilgen zor baǵa boldy. Búgin Aqordada buqaralyq aqparat quraldarymen ótken brıfıng barysynda QR Prezıdenti Nursultan Nazarbaev osylaı málimdedi.
Jýrnalıster saýalyna jaýap bere otyryp, Elbasy keshegi saılaýǵa basqalarǵa qaraǵanda kóbirek alańdaǵan adamnyń biri ekenin, televıdenıeden, barlyq óńirlerden túsip jatqan aqparattardy mezgil saıyn baqylap turǵanyn aıtty.
«Bilesizder me, eń birinshi ret saılanǵanda tolqý bir basqa, al 20 jyl osy laýazymda qyzmet etip kelip, saılaýǵa qatysý bul múldem basqa. Shyndyǵynda, halyqta da seniń ózińde de sharshaǵandyq bolýy múmkin. Marqum Lı Kýan ıÝ-dan «bári jaqsy kele jatyr edi ǵoı, nege kettińiz?» dep suraǵanymda ol, ózin telearnalardan kórgisi kelmegenin aıtqan. Árıne, bundaı sátter bizde de bolyp turady. Osy laýazymda uzaq jyldar otyrǵanyma qaramastan, keshe elder kezekke turyp, daýys berýge qatysty. Mınıstrlerdiń ózi bir saǵat kezekte turdy. Adamdardyń bala-shaǵasymen, qart kisilerdiń nemerelerin ertip, saılaýǵa belsendi qatysýy, mine meni tolqytqan sát osy. Bul júrekti tebirentpeı qoımaıtyn eń názik dúnıe», - dedi Nursultan Nazarbaev.
Sonymen qatar, Prezıdent Qazaqstan memleketiniń basshylyǵynda júrip ótken joldarǵa nazar aýdara otyryp, keshegi saılaý osyǵan berilgen baǵa bolǵanyn aıtty.
