Saılaý nátıjesi Memleket basshysynyń bastamalary júzege asatynyn bildiredi - sarapshy
«Bıylǵy saılaý Qazaqstannyń saıası júıesin tolyǵymen qaıta qurý jolyndaǵy sheshýshi qadam bolǵany sózsiz. Saılaý boıynsha jasalǵan aldyn ala qorytyndylar men ekzıt-pýll málimetteri qazirdiń ózinde tıisti nátıjeni shyǵarýǵa múmkindik beredi. Saılaý naýqany demokratııalyq normalarǵa saı ótti», - dedi A.Joldybalına «QSZI GPS» saraptamalyq alańy otyrysynda.
Osy oraıda ol jańa prezıdenttik mandat referendýmnan keıin ókilettikteri jaǵynan aıtarlyqtaı qysqarǵanyn eske saldy. Memleket basshysy qazirgi kezde de, bolashaqta da bıliktiń monopolııalanýyna jol bermeý maqsatynda kezekten tys saılaý ótkizý jáne bir rettik prezıdenttik merzimdi bekitý qadamyna bardy.
A.Joldybalına el halqy Memleket basshysyna taǵy da senim bildirip, saılaýshylardyń basym bóligi Qasym-Jomart Toqaevqa daýys bergenin aıtty.
Sarapshynyń paıymynsha, saılaý nátıjesi reformalardyń jalǵasatynyn, Qasym-Jomart Toqaev jarııalaǵan bastamalardyń júzege asatynyn bildiredi. Kelesi jeti jylda ekonomıkany monopolııasyzdandyrý jáne saıası ınstıtýttardy, ásirese, jergilikti deńgeıde nyǵaıtý boıynsha qadamdar qamtylmaq.
Sonymen qatar bıylǵy saılaýda baıqaýshylar erekshe belsendilik tanytqanyn jetkizdi.
«El halqynyń da belsendigi joǵary deńgeıde. Memleket basshysynyń árbir áreketi qoǵamnyń jiti nazarynda turǵanyn aıtqan jón. Saılaý qorytyndysy qoǵamda ádildikke, básekege qabilettilikke jáne naqty nátıjelerge suranystyń bar ekenin kórsetti», - dedi ınstıtýt ókili.
