Saılaý nátıjesi qazaq halqynyń pikirin pash etetin bolady - Ázerbaıjan OSK hatshysy

ASTANA. QazAqparat - Búgin QR Ortalyq saılaý komıssııasynyń tóraǵasy Qýandyq Turǵanqulov Ázerbaıjan Ortalyq saılaý komıssııasynyń hatshysy Mıkaıl Ragımovpen kezdesti.

«Biz Astanada ótetin saılaý protsesin baıqaımyz. Munan bólek, Ázerbaıjannan keletin taǵy bir top saılaý kúninde Almatyda bolady. Jalpy, Qazaqstanmen, QR Ortalyq saılaý komıssııasymen bizderdiń aramyzda óte jaqsy baılanys ornaǵan», - dedi ol kezdesýden keıin BAQ ókilderine bergen suhbatynda.

Sonymen qatar ol Qazaqstanda ótetin barlyq saılaý protsesine qatysatyndyqtaryn, qazaqstandyqtardyń da Ázerbaıjanda ótetin saılaýlarǵa turaqty atsalysatyndyǵyn basa aıtty.

«QR Ortalyq saılaý komıssııasy saılaý protsesinde uıymshyldyqpen jumys isteıdi. Menińshe, QR OSK-niń jyldar boıy jınaǵan mol tájirıbesi jaqsy nátıje beredi. Al saılaý protsesiniń nátıjesi qazaq halqynyń pikirin pash etetin bolady», - dedi M.Ragımov.