Saılaý nátıjesi halyq óz úmitin Prezıdentke júktep otyrǵandyǵyn kórsetti - saıasattanýshy
ASTANA. QazAqparat - Saılaý nátıjesi halyq óz úmitin Prezıdentke júktep otyrǵandyǵyn kórsetti, dep esepteıdi Qazaqstannyń belgili saıasattanýshysy Danııar Áshimbaev.
«Qazaqstanda 26 sáýirde bolǵan prezıdenttik saılaý eki rekord ornatty. Birinshiden, ol - saılaýshylardyń belsendiligi. Saılaýshylardyń daýys berýge kelgen úlesi TMD elderine, jalpy álem úshin bolmaǵan jaǵdaı. Bul elektorattyń joǵary belsendiligin jáne halyqtyń azamattyq ustanymynyń bıik ekendigin bildiredi. Saılaý komıssııalary da jaqsy jumys jasady degen sóz. Mundaı kórsetkish rekord bolyp sanalady», - deıdi ol búgin astanalyq tilshilerge bergen suhbatynda.
«Ekinshiden, aldyn ala exit-poll nátıjeleri boıynsha, qazirgi Prezıdenttiń senimdi jeńisi tirkeldi. Elbasy 97 paıyzdan astam daýys jınady. Bul kórsetkish halyq óziniń úmitin Prezıdenttiń isterimen baılanystyryp otyrǵandyǵyn kórsetedi. Barsha el Qazaqstannyń táýelsizdik jyldary ishinde qol jetkizgen jetistikterin joǵary baǵalaıdy. Ol - ultaralyq kelisim, saıası turaqtylyq, ekonomıkalyq reformalar, áleýmettik qamsyzdandyrýdyń joǵary deńgeıi. Azamattardyń Memleket basshysy usynǵan jańa reformalardy qoldaýy - el halqy memlekettiń osy baǵytta damýyn jalǵastyrýdy qalaıtyndyǵyn bildiredi», - dep túıdi sózin D. Áshimbaev.
