Saılaý Memleket basshysynyń Máńgilik El sekildi megajobasyn júzege asyrýǵa septigin tıgizedi - N. Orazalın
ASTANA. QazAqparat - Búgin Astanada jýrnalıstermen kezdesý barysynda Qazaqstan Jazýshylary odaǵynyń tóraǵasy, Parlament Senatynyń depýtaty Nurlan Orazalın Memleket basshysy N. Nazarbaevty qaıta saılanýymen quttyqtady.
«Keshe Qazaqstan halqy úlken tarıhı tańdaýyn jasady. Elbasy N. Nazarbaevqa memleket tizgini qaıta tapsyryldy. Al saılaý óte sátti ári joǵary deńgeıde, shynaıy demokratııalyq qundylyqtarǵa tán turpatta ótti. Sondyqtan da, biz osyndaı saýlaýda aıqyn basymdyqpen jeńiske jetken, qaıta Prezıdent bolyp saılanǵan N. Nazarbaevty quttyqtaǵymyz keledi. Bul quttyqtaý qolyna qalam ustaǵan qalyń qalamgerlerdiń, jazýshy qaýymnyń, rýhanı álemdegi eldiń tutastyǵyn kókseıtin qalamgerlerdiń quttyqtaýy dep qabyldasańyzdar da bolady», - dedi brıfıngte Qazaqstan Jazýshylar odaǵynyń tóraǵasy, senator Nurlan Orazalın.
Budan bólek, senator Elbasynyń jeńisin qalyń jurtshylyqtyń jeńisine balaıtynyn aıtty. Óıtkeni, Prezıdent óz taǵdyryn ult muraty jolyna arnap, shırek ǵasyr ishindegi qol jetken jetistiktiń bárin halqymen teń bólisip kele jatqan uly tulǵa.
«Aldymyzda elimizdiń ekonomıkalyq, rýhanı, saıası reformalardyń kúrdeli jumystary kútip tur. Sonyń bárin atqaratyn tulǵa, kóshbasshy - N. Nazarbaev. Bul - shyndyq! Sonyń ishinde Máńgilik El, «Qazaqstan-2050» strategııasy, «Nurly jol» sekildi megajobalardyń avtory - Elbasynyń ózi. Endeshe, sol jobany júzege asyrýda halyqtyń senimi qajet. Bul saılaý sol jobalardy júzege asyrýǵa óz septigin tıgizedi», - dedi N. Orazalın.
