Saılaý: Mańǵystaýda aýyl ákimdigine kandıdattardy usyný aıaqtaldy
Bul týraly qoǵamdyq kommýnıkatsııa ortalyǵynda ótken brıfıngide Mańǵystaý oblystyq saılaý komıssııasy tóraǵasynyń orynbasary Isahan Saǵynbaev málim etti.
Onyń aıtýynsha, 10 shilde kúni 39 kandıdattyń qujattary tekserildi. Onyń ishinde 34 úmitkerdiń qujattarynyń zańnamaǵa sáıkestigi anyqtaldy.
39 kandıdattyń arasynda 1 áıel adam qatysyp otyr.
«Kandıdattardyń ortasha jasy - 38 jas, eń jasy - 25 jasta, eń úlkeni - 60 jasta. 13 úmitker saılaý ótetin aýyl okrýginde turady, 20 úmitker saılaý ótetin aýdanda turady, 6 úmitker basqa aýdandarda turady», - dedi Isahan Saǵynbaev.
Barlyǵy 39 kandıdat usynyldy. Onyń 17-si saıası partııalardan, 22-si ózin-ózi usyndy.
Ortasha báseke - bir orynǵa 4 adamnan.
Saıası partııalar 10 okrýg boıynsha óz kandıdattaryn usyndy:
«Nur Otan» partııasynan - 8 úmitker
«Aq jol» partııasynan - 2 kandıdat
«ADAL» partııasynan - 3 kandıdat
Qazaqstan halyq partııasynan - 3 kandıdat
Jalpyulttyq sotsıal-demokratııalyq partııasynan - 1 kandıdat.
Óńirde 25 shilde kúni aýyldardyń, aýyldyq okrýgterdiń ákimin saılaý 7 aýdannyń tórteýinde josparlanǵan.