Saılaý: Lıngvıstıkalyq komıssııa J.Bázilbaevqa qatysty málimdeme jasady

ASTANA. QazAqparat - Búgin Ortalyq saılaý komıssııasynda memlekettik til synaǵyn tapsyrýdan bas tartyp, saılaýda óz kandıdatýrasyn alyp tastaǵan Jaqsybaı Bázilbaevqa qatysty lıngvıstıkalyq komıssııa óz túsiniktemesin berdi.

«Bázilbaev Jaqsybaı buryn da qatysqan. Búgin Lıngvıstıkalyq komıssııanyń aldyna emtıhan tapsyrýǵa kelgen ol kandıdatýrasyn alyp tastaý týraly ótinish beretinin, biraq saıası málimdeme jasaıtynyn aıtty. Lıngvıstıkalyq komıssııa emtıhandy bastaıyn dese, ol málimdeme jasaýǵa keldim deıdi. Sodan keıin bizdiń tóraǵa (Lıngvıstıkalyq komıssııanyń tóraǵasy M.Joldasbekov - agenttik) «lıngvıstıkalyq komıssııa saıası málimdeme jasaıtyn oryn emes, bizdiń mindetimiz - kanıdattyń qazaq tildi qanshalyqty meńgergenin anyqtaý», dep túsindirdi. Biraq kandıdat J.Bázilbaev málimdeme jasaýǵa kelgenin, emtıhan tapsyrmaıtynyn aıtqan soń, lıngvıstıkalyq komıssııa jumysyn aıaqtady», - dep atap ótti komıssııa múshesi Seıit Qasqabasov.

«Bul Jaqsybaı Bázilbaev oıyn aıtatyn brıfıng emes, baspasóz máslıhaty emes, bul - lıngvıstıkalyq komıssııanyń otyrysy. Bizdiń mindetimiz - ár adamnyń memlekettik tildi qanshalyqty meńgergenin, qaı dárejede meńgergenin, Konstıtýtsııaǵa sáıkes tolyq meńgergenin anyqtaý. Al saıası máselelerge aralaspaımyz», - dedi ol.