Saılaý: Qyzylorda oblysynda 590 kandıdat sáıkestendirý týraly qujat aldy

QYZYLORDA. QazAqparat – Qyzylorda oblysynda Parlament Májilisi jáne máslıhattar depýtattyǵyna 590 kandıdat sáıkestendirý týraly qujat aldy, dep habarlaıdy QazAqparat tilshisi.

Parlament Májilisine oblysta bir mandattyq retinde belgilengen №21 saılaý okrýgine barlyǵy 15 úmitker qujat usynǵan. Onyń ishinde 10-y ózin-ózi, qalǵan beseýi qoǵamdyq birlestik, «Aýyl», JSDP, «Amanat» jáne «Aq jol» partııasy atynan.

«Qazir úmitkerlerdiń qujattary tıisti zańdylyqtarǵa baılanysty zerttelý ústinde. Olarǵa ázirshe sáıkestendirý qujaty berilgen. Tapsyrǵan qujattary talapqa saı kelse, olar saılaýǵa úmitker retinde qatysa alady. Partııalyq tizim arqyly oblystyq máslıhat depýtattyǵyna 6 saıası partııadan 67 kandıdattyń usynym qujaty qabyldandy. Bir mandattyq aýmaqtyq saılaý okrýginde 58, qalalyq jáne aýdandyq máslıhat depýtattaryn saılaýǵa 450 kandıdat usynylǵan. Ortasha eseppen bir mandatqa 3 adamnan keledi. Eń úlken básekelestik retinde №4, 6, 16 okrýgterde 5 adamnan kelip otyr. Eń jas kandıdat 2002 jylǵy bolsa, eń eresegi 1958 jylǵy azamat», - dedi oblystyq saılaý komıssııasynan.

Eske salsaq, 19 qańtarda Memleket basshysy jetinshi saılanǵan QR Parlamentiniń Májilisin taratý jáne QR Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.

Májilis depýtattaryn kezekten tys saılaý 19 naýryzǵa belgilendi.

Sondaı-aq, Memleket basshysy barlyq deńgeıdegi máslıhattardyń ókilettigin toqtatý týraly Jarlyqqa qol qoıdy.

Buǵan deıin habarlanǵanyndaı, Ortalyq saılaý komıssııasyna 4 saıası partııa, sondaı-aq Respublica, Amanat, jáne «Aýyl» partııalary 19 naýryzda ótetin kezekten tys Májilis jáne máslıhattar depýtattary saılaýyna qatysty qujattardy usyndy.

Aıta ketsek, Ortalyq saılaý komıssııasy Májilis pen máslıhat depýtattaryn saılaýdyń kúntizbelik josparyn bekitken bolatyn. Kandıdattardy usyný saılaýdy taǵaıyndaý týraly Jarlyq jarııalanǵan kúnnen bastalyp, 8 aqpanda ár aımaqta jergilikti ýaqyt boıynsha saǵat 18.00-de aıaqtaldy. Úmitkerlerdi tirkeý 20 qańtardan 18 aqpanǵa deıin jalǵasady. Saılaý aldyndaǵy úgit-nasıhat 18 aqpan kúni saǵat 18:00-de bastalyp, 18 naýryz saǵat 00:00-ge deıin júrgiziledi. 18 naýryz – tynyshtyq kúni. 19 naýryz – saılaý kúni.