Saılaý kúninde boljam nátıjelerin jarııalaýǵa tyıym salynady - OSK
ASTANA. KAZINFORM – 23 tamyzda ótetin Quryltaı depýtattaryn saılaý kúninde boljam nátıjelerin jarııalaýǵa shekteý qoıylady. Bul týraly Ortalyq saılaý komıssııasynyń otyrysynda komıssııa múshesi Lázzat Súıindik málim etti.
- 22 tamyz tynyshtyq kúni ekenin eske salǵym keledi. Osy kúni jáne daýys berý kúni kez kelgen saılaý aldyndaǵy úgit júrgizýge tyıym salynady. Bul rette buryn ornalastyrylǵan úgit materıaldary óz oryndarynda qaldyrylýy múmkin. Atap aıtqanda, saılaý komıssııalarynyń úı-jaılary men daýys berýge arnalǵan úı-jaılardan tys jerlerde buryn ornalastyrylǵan baspa úgit materıaldary burynǵy oryndarynda saqtalýy múmkin, - dedi ol.
Onyń aıtýynsha, osyǵan uqsas tártip ınternet jelisinde ornalastyrylǵan materıaldarǵa da qoldanylady. Buǵan deıin ınternet jelisinde ornalastyrylǵan úgit materıaldary burynǵy oryndaryna saqtalýy múmkin. Biraq olardy ınternet-resýrstardyń basty betterine shyǵarýǵa jol berilmeıdi.
- Saýaldar men boljamdardyń nátıjelerin jarııalaýǵa baılanysty shekteýlerge de erekshe nazar aýdarý qajet. Qoǵamdyq pikirge saýal salý nátıjelerin, saılaý nátıjeleriniń boljamdaryn, saılaýǵa baılanysty ózge de zertteýlerdiń kandıdattardy nemese saıası partııalardy qoldap daýys berý nátıjeleriniń buqaralyq aqparat quraldarynda jáne onlaın-platformalarda daýys berý kúnine deıingi 5 kún ishinde jáne daýys berý kúni jarııalanýyna jol berilmeıdi. Daýys berý kúni tikeleı saýal salýǵa da shekteýler belgilengen. Saılaý kúni daýys berýge arnalǵan úı-jaıda nemese pýnkte qoǵamdyq pikirge saýal salýǵa tyıym salynady. Sonymen qatar, daýys berýge arnalǵan úı-jaıdan nemese pýnkten tys jerlerde Ortalyq saılaý komıssııasyn habardar etken uıymdar ekzıtpol saýaldaryn júrgize alady, - dedi Lázzat Súıindik.
Aıta keteıik, Quryltaı depýtattaryn saılaý barysyn 777 halyqaralyq baıqaýshy qadaǵalaıdy. Onyń ishinde 160 baıqaýshy 42 shet memleketten, al 617 baıqaýshy 13 halyqaralyq uıymnan tirkelgen.
