Saılaý kúni quqyq buzýshylyq jasaǵan 42 adam jaýapqa tartyldy – OSK
«Daýys berý kúni saılaý zańnamasyn saqtaý sheńberinde ýchaskelik saılaý komıssııalary tıisti quqyqtyq jaýapkershilik sharalaryn qoldandy. Osylaısha, zańdy buzǵany úshin ýchaskelik komıssııalardyń sheshimimen olardyń jumysyna qatysýdan 19 múshe dereý shettetildi. Atalǵan aqparattyq materıaldardyń áleýmettik jelilerde taralýyna jáne saılaý komıssııalaryna osyndaı ótinishterdiń túsýine baılanysty biz Bas prokýratýraǵa 19 naýryz – saılaý kúni tekserý jáne quqyqtyq baǵalaý júrgizý týraly suraý salý jiberdik», - dedi OSK tóraǵasy.
Onyń aıtýynsha, Bas prokýratýra usynǵan aqparatqa saı, saılaý kúni kúni 42 adam quqyq buzýshylyq jasap, ákimshilik jaýapqa tartylǵan.
«Bas prokýratýranyń resmı aqparaty boıynsha daýys berý kúni 42 adam quqyq buzýshylyq jasap, olardyń barlyǵy jaýapqa tartyldy. Olardyń ishinde 7 ýchaskelik komıssııa múshesine Ákimshilik quqyqbuzýshylyq týraly kodekstiń 108-baby, al 18 ýchaskelik komıssııa múshesine 110-bap boıynsha aıyppul salyndy. Alaıda osy áreketter azamattardyń erik bildirý nátıjesine áser etpedi jáne saılaý okrýgindegi nemese tıisti ákimshilik aýmaqtyq birliktegi saılaý nátıjesin senimdi túrde anyqtaýǵa múmkindik berdi. Ókinishke qaraı, osy ýaqytqa deıin otbasylyq daýys berý dástúri, ıaǵnı otbasy músheleri men basqa da jaqyndary úshin daýys berý, daýys berýge arnalǵan kabınada bir mezgilde bir adamnan artyq bolý dástúri jáne taǵy basqa kemshilikter áli de joıylǵan joq», - dep málim etti Nurlan Ábdirov.
