Saılaý kúni qoǵamdyq tártipti qamtamasyz etýge 30 myńnan astam polıtsııa qyzmetkeri jumyldyryldy - ІІM
ASTANA. 18 qańtar. QazAqparat /Rýslan Ǵabbasov/ - 15 qańtarda Qazaqstan Respýblıkasy Parlament Májilisiniń jáne barlyq deńgeıdegi máslıhattar saılaýy kezinde qaýipsizdikti qamtamasyz etýge 30 myńnan astam polıtsııa qyzmetkeri jumyldyryldy.
Bul týraly búgin Іshki ister mınıstrliginiń baspasóz qyzmetinen habarlady.
«Saılaý kezinde Іshki ister organdary qoǵamdyq qaýipsizdikti qamtamasyz etti. Oǵan 30 myńnan astam qyzmetker qatysty, olardyń 4 myńǵa jýyǵy ishki ásker qyzmetkerleri. Qoǵamdyq tártipti saqtaý úshin saılaý ýchaskelerine 19 myń polıtsııa qyzmetkeri tartyldy»,- delingen taratylǵan habarlamada.
Saılaý ótkizetin oryndarǵa patrýldik polıtsııa qyzmeti barynsha jaqyn ornalastyryldy. «Іshki ister organdarynyń qyzmetkerleri «Qazaqstan Respýblıkasyndaǵy saılaý týraly» Konstıtýtsııalyq Zańynyń talaptaryn múltiksiz saqtap, oryndady. Saılaý komıssııasy men azamattar tarapynan eshqandaı eskertýler men shaǵymdar túsken joq. Saılaý kezinde qoǵamdyq tártipti buzý faktilerine jol berilgen joq», - dep atap ótti baspasóz qyzmetinen.
