Saılaý kúni qoǵamdyq tártipti qadaǵalaý úshin 20 myńnan astam tártip saqshysy jumyldyrylǵan
ASTANA. QazAqparat Qazaqstanda ótip jatqan saılaý kúnindegi tártipti qadaǵalaý úshin ishki ister organdarynyń 20 myńnan asa qyzmetkeri kúsh jumyldyrylǵan. Bul týraly búgin Ortalyq kommýnıkatsııalar qyzmetine kelip, brıfıng ótkizgen Іshki ister mınıstriniń birinshi orynbasary Marat Demeýov málim etti.
«Іshki ister organdarynyń 20 myńnan asa qyzmetkeri saılaý kúninde qoǵamdyq tártip pen qaýipsizdikti qadaǵalaýda», - dep málim etti M.Demeýov.
Іshki ister vıtse-mınıstriniń habarlaǵanyndaı, jalpy, ishki ister organdarynyń jeke quramy 17 - 24 naýryz aralyǵynda kúsheıtilgen rejımde jumys isteıdi. Olardyń jumysyn úılestirý úshin Іshki ister mınıstrligi men aýmaqtyq ishki ister departamentterinde arnaıy shtabtar qurylǵan.
«Basshylyq pen komandalyq quram táýlik boıy kezekshilik atqaryp júr. Eldi mekenderde qosymsha kúsh tartý arqyly patrýlder sany kóbeıip, olardyń birazy saılaý ýchaskelerine jaqyn aýmaqtarǵa ornalastyryldy. Barlyq qaladaǵy aýdandarda 2-3-ten mobıldi jedel-tergeý toptary qurylyp, top quramyna prokýratýra ókilderi de qosylǵan»,-dep atap ótti M.Demeýov.
Eń basty aıta keterligi, M.Demeýovtiń habarlaýynsha, ishki ister organdary búkil saılaý ýchaskelerin kúni-túni kúzetke alǵan. «Sondaı-aq, búgin, saılaý kúni joldardaǵy qaýipsizdik qatty baqylanyp, órt sóndirýshiler men qutqarýshy bólimsheler de kúsheıtilgen kestedegi jumysqa kóshken», - dep atap ótti M.Demeýov.
Esterińizge sala keteıik, búgin Qazaqstan Respýblıkasynda Parlament Májilisiniń jáne barlyq deńgeıdegi máslıhat saılaýy ótip jatyr. Qazaqstan men shet elderdi qosa alǵanda, barlyǵy 9840 saılaý ýchaskesinde tańǵy saǵat 07.00-den beri daýys berý júrip jatyr. Daýys berý keshki saǵat 20,00-de aıaqtalady.
Májilis saılaýyna alty saıası partııa saılaýǵa qatysýda. Barlyq partııalardy qosqanda, QR Parlament Májilisi depýttattyǵyna úmitker retinde 234 kandıdattyń tizimi bekitilgen.
