Saılaý kúni elordada mobıldi HKO-lar jumys isteıdi
NUR-SULTAN. QazAqparat - Elordadaǵy Oqýshylar saraıynda aldaǵy prezıdenttik saılaýdy uıymdastyrýshylarǵa jáne daýys berý protsesine qatysýshylarǵa arnalǵan semınar ótti, dep habarlaıdy QazAqparat.
Qala ákimdiginiń baspasóz qyzmetinen málim etkendeı, semınarǵa aýmaqtyq saılaý komıssııalarynyń músheleri, ýchaskelik saılaý komıssııalarynyń tóraǵalary men hatshylary, sot, tótenshe jaǵdaı jónindegi basqarma ókilderi qatysty.
Belgili bolǵandaı, daýys berýshiler tiziminen ózin tappaǵan azamattar úshin mobıldi Halyqqa qyzmet kórsetý ortalyqtary jumys isteıtin bolady.
«Ár saılaý ýchaskesinde telefon, ǵalamtor jáne Halyqqa qyzmet kórsetý ortalyǵy (HQKO) úshin mobıldi baılanys operatorlarynyń jeke jelisi sııaqty baılanys quraldary ornatylady. Bul jolǵy saılaýdaǵy jańalyqtyń biri - 204 saılaý ýchaskesinde halyqqa mekenjaılyq anyqtamalar beretin mobıldi Halyqqa qyzmet kórsetý ortalyqtary (HQKO) ashylady. Saılaýshylardyń belsendiligin arttyrý maqsatynda uıymdastyrylatyn mobıldi HQKO 2019 jyldyń 1 maýsymynda testileý tártibinde iske qosylady», - delingen aqparatta.
«Árbir ashyq ýchaskede daýys berýge arnalǵan 4 standartty kabına jáne múmkindigi shekteýli azamattarǵa arnalǵan 1 kabına ornatylǵan. Jabyq saılaý ýchaskeleri 2 standartty kabınamen jáne qajetine qaraı múmkindigi shekteýli azamattarǵa arnalǵan kabınalarmen jabdyqtalady. Sondyqtan jabyq saılaý ýchaskelerindegi komıssııa tóraǵalarynan múmkindigi shekteýli azamattarǵa arnalǵan kabınaǵa ótinimder joldaýdy suraımyn», - dep túsindirdi Nur-Sultan qalasy ákiminiń orynbasary Erlan Qanalımov.
Barlyq ýchaskelerdi tolyq materıaldyq-tehnıkalyq jaǵynan jaraqtandyrý jumystary 20 mamyrǵa deıin aıaqtalady.
«Jumys barysynda 238 ýchaskede 17 pandýstyń joq ekendigin anyqtadyq. Bul kemshilikterdi joıý úshin arnaıy mamandandyrylǵan kompanııany tarttyq. Bul jerde biz qaıyrymdylyq is emes, múgedekterdiń qoǵamnyń tolyqqandy múshesi retindegi zańdy quqyqtaryn qorǵaýdy qamtamasyz etemiz. Múmkindigi shekteýli adamdarǵa arnalǵan qolaıly ortany qurýda elorda ózge óńirlerge úlgi bolýy tıis», - dep málimdedi Erlan Qanalımov.
Foto: elorda.info
