Saılaý kúni elordada qandaı mádenı-buqaralyq is-sharalar ótedi
NUR-SULTAN. QazAqparat - Saılaý kúni Nur-Sultanda qala turǵyndary úshin túrli mádenı-buqaralyq is-sharalar ótedi, naqtyraq aıtqanda kontsertter, tanymal akterlerdiń qatysýymen baǵdarlamalar, sporttyq jarystar uıymdastyrylady, dep habarlaıdy QazAqparat ákimdiktiń saıtyna silteme jasap.
«Astana» kontsert zalynyń aldyndaǵy alańda saǵat 09:00-den 11:00-ge deıin Nur-Sultan memlekettik akademııalyq fılarmonııasy solısteriniń kontserti ótedi.
«Jastar» teatry ǵımaratynyń aldynda saǵat 11.00-de tanymal akterlerdiń qatysýymen qyzyqty mádenı baǵdarlama ótedi.
Saılaý ýchaskelerinde «Juldyzdarmen selfı» aktsııasy ótedi. Saılaýshylar «Qazaqstan barysy» respýblıkalyq týrnıriniń qatysýshylarmen jáne tanymal sportshylarmen sýretke túse alady. Aktsııaǵa boksshy Danııar Eleýsinov jáne akter Tursynbek Qabatov qatysady. Sondaı-aq Qydyráli Bolmanov, Qaraqat Ábildına, Altynaı Jorabaeva sekildi estrada juldyzdarynan qoltańba alýǵa bolady.
Saǵat 10:00-de Botanıkalyq baq, qalalyq, «Jeruıyq» jáne «Jetisý» saıabaqtarynda «Fitness Park Nur-Sultan» baǵdarlamasy boıynsha sporttyq is-sharalar ótedi. Olardyń arasynda CrossFit, ıoga, boks, brazılııalyq djıý-djıtsý sporty jáne tanymal Zumba bıi bar.
8 jáne 9 maýsymda «Qazaqstan» sport kesheniniń janynda, Saýran kóshesindegi 7A jáne 5 úıler arasyndaǵy alańda, sondaı-aq Qosshyǵululy kóshesi, 14 jáne 189, 5 mekenjaılary boıynsha aýyl sharýashylyǵynyń jármeńkeleri uıymdastyrylady.
Jármeńkege elordanyń, Qaraǵandy oblysy Abaı aýdanynyń, Aqmola oblysy Tselınograd aýdanynyń, Qostanaı oblysy Arqalyq qalasynyń taýar óndirýshileri óz ónimderin usynady.
