Saılaý kúni basqa qalada bolsańyz, qalaı daýys berýge bolady
ASTANA. KAZINFORM — Eger daýys berý kúni basqa qalada, oblysta nemese elde bolyp, turaqty tirkelgen jerińiz boıynsha daýys bere almaıtyn bolsańyz, qazir esepten shyǵarý kýáligin alýǵa quqyǵyńyz bar, dep habarlaıdy Ortalyq saılaý komıssııasynyń baspasóz qyzmeti.
Saılaýshynyń esepten shyǵarý kýáligin alýǵa quqyǵy bar. Ol úshin jazbasha ótinish berip, jeke basyn kýálandyratyn qujatty usyný jetkilikti. Esepten shyǵarý kýáligi 22 tamyz kúni saǵat 18:00–ge deıin beriledi.
— Esepten shyǵarý kýáligin jeke ózińiz, sondaı-aq senimhat boıynsha ókil arqyly alýǵa bolady. Senimhatty notarıaldyq kýálandyrý talap etilmeıdi. Saılaýshy bolatyn jeri boıynsha saılaý ýchaskesinde daýys berý kezinde esepten shyǵarý kýáligin jáne jeke basyn kýálandyratyn qujatty usynady. Ýchaskelik saılaý komıssııasy saılaýshyny saılaýshylar tizimine engizip, esepten shyǵarý kýáliginiń ornyna daýys berýge arnalǵan bıýlleten beredi, — dep túsindirdi Ortalyq saılaý komıssııasy.
OSK esepten shyǵarý kýáligi joǵalǵan jaǵdaıda qalpyna keltirilmeıtinin jáne onyń telnusqasy berilmeıtinin eskertti.
— Bir eldi meken sheginde basqa saılaý ýchaskesinde daýys bergisi keletin saılaýshylarǵa daýys berý quqyǵyna arnalǵan esepten shyǵarý kýáligi berilmeıdi, — delingen habarlamada.
Buǵan deıin Qostanaı oblysynda 716 saılaý ýchaskesi daýys berýge daıyn ekenin jazǵanbyz.
