Saılaý komıssııalarynyń 40 protsenti jańartyldy - OSK
Saılaý protsesin uıymdastyrý bóliminiń bastyǵy Dáýren Ysqaqovtyń aıtýynsha, komıssııa músheleri saıası partııalardyń usynystary negizinde máslıhat depýtattarymen saılandy. Zańǵa sáıkes, partııalardyń usynystary komıssııa quramyn qalyptastyrýǵa jetkiliksiz bolsa, onda qoǵamdyq birlestikterdiń, sodan keıin joǵary turǵan saılaý komıssııalarynyń usynystary eskeriledi. Osy joly komıssııa músheleriniń 68,7 protsenti saıası partııalardyń usynystary negizinde saılandy. Sonyń ishinde «Nur Otan» partııasynan - 14,5 protsent, Qazaqstannyń kommýnıstik halyqtyq partııasynan - 14 protsent, «Aýyl» demokratııalyq patrıottyq partııasynan - 13,7 protsent, «Aqjol» demokratııalyq partııasynan - 13,4 protsent, «Birlik» saıası partııasynan - 13 protsent, Jalpyulttyq sotsıal-demokratııalyq partııasynan - 0,11 protsent komıssııalardyń quramyna endi. Qalǵany qoǵamdyq birlestikter men joǵary turǵan komıssııalardyń usynystary negizinde saılandy. Budan bólek, respýblıka boıynsha 1 481 múmkindigi shekteýli azamat kommıssııalarǵa kirdi.
«Osylaısha, barlyǵy 10 202 saılaý komıssııasynyń quramy qalyptastyryldy. 232 aýmaqtyq, onyń ishinde 17 oblystyq, Astana, Almaty men Shymkenttiń komıssııalary, 215 qalalyq jáne aýdandyq komıssııalar, sondaı-aq, 9 970 ýchaskelik komıssııa bar. 2014 jylmen salystyrǵanda saılaý komıssııalarynyń sany 3 105-ke azaıǵan. Bul rette aýmaqtyq komıssııalardyń sany 9-ǵa, al ýchaskelik komıssııalar 221-ge kóbeıdi. Saılaý zańnamasynda jańalyqtarǵa sáıkes okrýgtik komıssııalardyń quramy qalyptastyrylmaǵan», - dedi D. Ysqaqov búgin Ortalyq saılaý komıssııasynyń keńeıtilgen otyrysynda.
Onyń sózine qaraǵanda, ýchaskelik komıssııa músheleriniń sany 1 905-ke qysqaryp otyr. Al saılaý komıssııalarynyń quramy 40,5 protsentke jańartyldy. «Komıssııa músheleriniń 70 protsentinde saılaý salasynda jumys tájirıbesi bar. 66,4 protsentinde joǵary bilimi bar. Ortasha jasy - 44. Komıssııa músheleriniń 55,8 protsenti 35-55 jas aralyǵynda. 30 jasqa deıingi músheler 13,6 protsentti quraıdy. 66,8 protsenti - áıelder», - dep atap kórsetti D.Ysqaqov.
Aıta keteıik, búgin QR Ortalyq saılaý komıssııasy ótken jylǵy aýyl ákimderin saılaýdyń qorytyndysyn jarııalady. Oǵan sáıkes, byltyr elimizde 600-ge jýyq ákim aýysty.
