Saılaý komıssııalarynyń 18 múshesi basqa adam úshin daýys berýge bıýlleten bergen – Bas prokýratýra

ASTANA. QazAqparat – Saılaý komıssııalarynyń 18 múshesi azamattarǵa basqa adam úshin daýys berýge bıýlleten bergen. Bul týraly Bas prokýratýra ókili Azamat Sarǵazın aıtty, dep habarlaıdy QazAparat tilshisi.

«Saılaý quqyqtaryna qol suǵatyn ákimshilik quqyq buzýshylyqtar boıynsha óndiris qozǵaý quqyǵy prokýrordyń erekshe quziretinde. Azamattarǵa basqa adamdarǵa daýys berý múmkindigin usyný maqsatynda bıýlletenderdi berý túrindegi quqyq buzýshylyqtar úshin ýchaskelik komıssııalardyń 18 múshesine Ákimshilik quqyq buzýshylyq týraly kodekstiń 110-babymen aıyppul salyndy. Onyń ishinde Almaty oblysynda – 5, Soltústik Qazaqstan oblysynda – 3, Jambyl, Jetisý, Túrkistan oblystarynda – 2-den, Almaty men Shymkent qalalarynda, Aqtóbe, Pavlodar oblystarynda birden», - dedi ol Ortalyq saılaý komıssııasyndaǵy brıfıng barysynda.

Onyń atap ótýinshe, teń saılaý quqyǵy týraly talapty basqa saılaýshynyń atynan daýys berý arqyly buzǵany úshin Ákimshilik quqyq buzýshylyq týraly kodekstiń 108-babymen 17 adam ákimshilik jazaǵa tartyldy.

Onyń ishinde Shyǵys Qazaqstan oblysynda – 4, Almaty oblysynda – 3, Jambyl, Jetisý, Qaraǵandy, Soltústik Qazaqstan oblystarynda – ekeýden, Aqtóbe Túrkistan oblystarynda bireýden fakti bar.

«Osy 17 quqyq buzýshylyqtyń 4-eýi ýchaskelik komıssııa músheleri tarapynan oryn alǵan», - dedi Azamat Sarǵazın.