Saılaý komıssııalarynda isteıtin mamandardyń jalaqysy qandaı
QR Ortalyq saılaý komıssııasynyń bólim bastyǵy Dáýren Ysqaqovtyń aıtýynsha, búginde elimizde 232 aýmaqtyq saılaý komıssııasy bar. Budan bólek, 9 970 ýchaskelik saılaý komıssııalary qurylǵan.
«Bıyldan bastap árbir aýmaqtyq komıssııada taǵy eki adam turaqty túrde jumys atqarady. Olardyń sany respýblıka boıynsha 464 adamdy quraıdy. Demek, barlyǵy resmı túrde jumysqa qabyldandy. Buryn olar qoǵamdyq negizde qyzmet atqaratyn. Endi resmı túrde jumys istep, jalaqy alady. Oblystyq deńgeıde jalaqynyń kólemi 250 myń teńge kóleminde belgilense, aýdandyq deńgeıde 175 myń teńge tólenedi. Bizge jańa adamdar keldi. Olardyń ishinde jastar da az emes. 30 jasqa deıingi azamattardyń 13,6 protsenti bizdiń komıssııalarǵa kelip jatyr», - dedi D.Ysqaqov jýrnalısterge bergen suhbatynda.
Onyń sózine qaraǵanda, saılaý komıssııasynda isteıtin adamdarǵa jasyna qaraı shekteý joq. Búginde 78 jastaǵy bir maman Qyzylorda oblysynda jumys istese, eń jas - 21 jastaǵy qyzmetker Almaty qalasynyń Medeý aýdanynda eńbek etedi. «Olar aımaqtarda saılaý protsesimen aınalysady. Taldaý jasaıdy, túgendeý jumysyn júrgizedi, ýchaskelerdi saılaýǵa daıyndaıdy, ádistemelik jabdyqtaý bar jáne taǵysyn taǵylar», - dep atap kórsetti saılaý protsesin uıymdastyrý bóliminiń bastyǵy.
Aıta keteıik, búgin QR Ortalyq saılaý komıssııasy ótken jylǵy aýyl ákimderin saılaý qorytyndysyn jarııalady. Oǵan sáıkes, byltyr elimizde 600-ge jýyq ákim aýysqan. Bıyl saılaý komıssııalarynyń bes jyldyq ókilettik merzimi aıaqtalyp otyr. Osyǵan baılanysty jergilikti jerde komıssııalardyń quramy ózgerdi.
