Saılaý: Kimder Senat depýtaty bola alady
NUR-SULTAN. QazAqparat - 2020 jyldyń 13 maýsymynda Senat depýtattyǵyna kandıdattardy usyný bastalady. Bul týraly QR Ortalyq saılaý komıssııasy tóraǵasynyń orynbasary Konstantın Petrov aıtty, dep habarlaıdy QazAqparat tilshisi.
«2020 jyldyń 15 qazanynda óńirlerden saılanǵan Senat depýtattarynyń ókilettikteri aıaqtalady. Saılaýdy QR Prezıdenti is basyndaǵy depýtattardyń ókilettigi aıaqtalǵanǵa deıin tórt aı buryn, ıaǵnı 15 shildeden keshiktirmeı belgileıdi jáne ol eki aı buryn, ıaǵnı 15 tamyzdan keshiktirilmeı ótkiziledi. Ózderińiz biletindeı, búgin QR Prezıdentiniń QR Parlamenti Senaty depýtattarynyń saılaýyn 2020 jyldyń 12 tamyzyna belgileý týraly qaýlysy shyǵyp , kúshine endi», - dedi ol komıssııanyń onlaın otyrysy barysynda.
Onyń atap ótýinshe, Parlament Senatynyń depýtattyǵyna kandıdattardy usyný saılaý taǵaıyndalǵan kúnnen keıingi kúnnen, ıaǵnı 13 maýsymnan bastalady jáne saılaý ótkiziletin kúnge bir aı qalǵanda jergilikti ýaqyt boıynsha 2020 jylǵy 12 shildede saǵat 18.00-de aıaqtalady.
«Qazaqstan Respýblıkasy Parlamenti Senatynyń depýtattyǵyna kandıdattar usynýdy máslıhattar, sondaı-aq ózin-ózi usyný tártibimen júzege asyrady. Otyz jasqa tolǵan, joǵary bilimi jáne keminde bes jyl jumys ótili bar, tıisti oblystyń, respýblıkalyq mańyzy bar qalanyń ne astananyń aýmaǵynda keminde úsh jyl turaqty turatyn adam Senat depýtaty bola alady. Sot áreketke qabiletsiz dep tanyǵan azamattardy saılaýǵa jáne olardyń saılanýǵa quqyǵy joq. Sottylyǵy zańda belgilengen tártippen ótelmegen nemese alynbaǵan adam, sondaı-aq sybaılas jemqorlyq qylmysyn jáne sybaılas jemqorlyq quqyq buzýshylyǵyn jasaǵany úshin kinásin sot zańda belgilengen tártippen tanyǵan adam Qazaqstan Respýblıkasy Parlamenti Senatynyń depýtattyǵyna kandıdat bola almaıdy», - dedi K.Petrov.
