Saılaý kezinde qaı elderden baıqaýshylar keledi
ASTANA. KAZINFORM – Búgin Ortalyq saılaý komıssııasy qosymsha 9 shet memleketten jáne 4 halyqaralyq uıymnan 155 halyqaralyq baıqaýshyny akkredıttedi.
Búgin komıssııa otyrysynda sóz sóılegen OSK Tóraǵasynyń orynbasary M.Erman Eýropa elderi men TMD memleketteriniń halyqaralyq baıqaýshylary Qazaqstanda ótetin saılaý naýqanyna erekshe qyzyǵýshylyq tanytyp otyrǵanyn aıtty.
- 2026 jylǵy 3 tamyzdaǵy jaǵdaı boıynsha Qazaqstan Syrtqy ister mınıstrligi Ortalyq saılaý komıssııasyna 9 shet memleketten jáne 4 halyqaralyq uıymnan 155 halyqaralyq baıqaýshynyń kandıdatýrasyn akkredıtteýge usyndy. Olardyń ishinde EQYU Parlamenttik Assambleıasynan - 86 baıqaýshy, TMD Baıqaýshylar mıssııasynan - 22, TMD PAA - 23, UQShU PA-dan 6 baıqaýshy bar. Shet memleketterden: Reseı Federatsııasynan - 3 baıqaýshy, Ázerbaıjan Respýblıkasynan, Armenııa Respýblıkasynan, Iordanııa Hashımıt Koroldiginen, Qyrǵyz Respýblıkasynan, Moldova Respýblıkasynan, Mıanma Odaǵy Respýblıkasynan jáne Rýmynııadan - árqaısysynan 2 baıqaýshy, Ýkraınadan 1 kandıdatýra usynyldy, - dedi Muhtar Erman.
Aıta keteıik, atalǵan mıssııalardyń quramyna 29 eldiń: Avstrııa, Ázerbaıjan, Albanııa, Belarýs, Belgııa, Bosnııa jáne Gertsegovına, Ulybrıtanııa, Vengrııa, Germanııa, Ispanııa, Italııa, Qyrǵyzstan, Latvııa, Lıýksembýrg, Nıderland, Norvegııa, Polsha, Reseı, Rýmynııa, Soltústik Makedonııa, Slovenııa, Tájikstan, Túrkııa, Fınlıandııa, Frantsııa, Horvatııa, Chernogorııa, Chehııa jáne Shvetsııa memleketteriniń atynan 74 depýtat kiredi.
Sonymen qatar Ortalyq saılaý komıssııasy akkredıttegen delegatsııalardyń qatarynda shet memleketterdiń ortalyq saılaý organdarynyń 12 delegatsııasy bar. Olardyń jeteýin Ázerbaıjan, Armenııa, Grýzııa, Qyrǵyzstan, Moldova, Pákistan jáne Reseıdiń ortalyq saılaý komıssııalarynyń tóraǵalary bastap keledi. Budan bólek, Tájikstan, Túrkııa jáne Ózbekstannyń ortalyq saılaý organdarynyń basshylary da saılaýdy baıqaýǵa qatysatynyn rastady.
Osylaısha, búginge deıin Ortalyq saılaý komıssııasy shet memleketter men halyqaralyq uıymdardan 251 halyqaralyq baıqaýshyny akkredıttedi. Akkredıtteýge qatysty usynystar kelip túsken saıyn halyqaralyq baıqaýshylar týraly málimetter jańartylyp otyrady.
Budan buryn habarlanǵandaı, el aýmaǵynda ýchaskelik saılaý komıssııalary jumysyna kiristi.
