Saılaý kezinde elektrondy tsıfrlyq qoltańbany qoldaný qajet - Ámirjan Qosanov
«Búginde bizde elektrondy tsıfrlyq qoltańba bar. Sony saılaý kezinde nege paıdalanbaımyz? Anaý oblys pen aýdan ortalyǵynan shalǵaı jatqan azamattar nege qoldaý protsesine qatysa almaıdy. Osyny oılaý qajet. Qazirgi kezde elektrondy tsıfrlyq qoltańba arqyly nekege turyp jatyr, úılenip jatyr, ajyrasyp jatyr. Al ony bolashaqta saılaý naýqanynda da paıdalanýǵa bolady», - dedi Á.Qosanov Ortalyq saılaý komıssııasynda ótken baspasóz máslıhatynda.
Onyń aıtýynsha, saılaýaldy baǵdarlama daıyn. Ony 11 mamyrda jarııalaý josparlanyp otyr.
Aıta keteıik, búgin QR Ortalyq saılaý komıssııasy «Ult taǵdyry» birlesken ulttyq-patrıottyq qozǵalysynyń múshesi, jýrnalıst Ámirjan Qosanovtyń kandıdattyq kýáligin tapsyrdy.
«Orazanyń alǵashqy kúni saılaý komıssııasynyń bizge kýálik bergenin jaqsy yrymǵa balap otyrmyn. 7-shi nómir eken. Men kýálikti jetinshi bolyp alyp otyrmyn. Ony da jaqsylyqqa balap otyrmyn. Jasyratyny joq, meni usyný jáne qol jınaý kezinde biraz kúmán boldy. Osy Qosanov saılaýǵa tirkele me, tirkelmeı me degen kúmán da boldy, ártúrli arandatýlar da boldy. Qasaqana jasalǵan bir aqparattyq shabýyldar boldy. Osy kúnge deıin men jáne meniń áriptesterim tirkeý bolmaıtyn shyǵar dep oıladyq. Biraq búgingi kúni Prezıdent Qasym-Jomart Toqaevtyń «ádil saılaý ótkizýge kepildik beremin» degen sóziniń bir nyshany dep bilemin, solaı qabyldaımyn», - dep atap kórsetti Á.Qosanov.
