Saılaý Qazaqstandaǵy demokratııalyq qadamnyń biri ekenin kórsetti - ázerbaıjandyq depýtat

NUR-SULTAN. QazAqparat – Keshegi ótken saılaýǵa qatysty otandyq jáne halyqaralyq baıqaýshylar óz pikirlerimen bólisip, saılaýdyń ótý barysyn talqylap jatyr. Solardyń biri Ázerbaıjan Mıllı Medjlısiniń depýtaty, Túrkitildes memleketterdiń Parlamenttik Assambleıasy (TúrkPA) mıssııasynyń múshesi, Nagıf Hamzaev óz oıyn ortaǵa saldy, dep habarlaıdy QazAqparat tilshisi.

«Barlyǵy jaqsy deńgeıde ótti. Biz bul saılaýdyń Qazaqstan halqy úshin mańyzdy ekenin jáne bul demokratııalyq qadam ekenin bilemiz. Saılaý kezinde barlyq sanıtarlyq talaptardyń saqtalǵanyn erekshe baıqadym. Saılaýda daýys berýshiler de, baıqaýshylar da jáne BAQ ókilderi de óz quqyqtaryn teńdeı júzege asyra aldy. Saılaýdyń ótý barysyn túrli partııa ókilderi men táýelsiz baıqaýshylardyń qadaǵalaǵanyn kórdik. Bul saılaýdyń demokratııaly túrde ótkenin ańǵartady. Túrkııa jáne ózge de túrkitildes memleketter Ázerbaıjandy qoldaıdy. Qazaqstan eline de qoldaý úshin alǵysymdy bildiremin. Biz saılaýdan keıin ekijaqty ekonomıkalyq jáne mádenı yntymaqtastyqty odan ári jalǵastyratyn bolamyz», - dedi Nagıf Hamzaev elordada táýelsiz halyqaralyq baıqaýshylardyń qatysýymen ótken baspasóz máslıhatynda.

Buǵan deıin habarlaǵanymyzdaı, elimizdegi saılaý barysyn TúrkPA atynan 8 baıqaýshy qadaǵalaǵan bolatyn.