Saılaý: Qazaqstan azamattary 51 elde daýys bere alady

NUR-SULTAN. QazAqparat - Álemniń 51 elinde 2019 jyldyń 9 maýsymynda ótetin QR Prezıdentiniń kezekten tys saılaýyna oraı 65 saılaý ýchaskesi quryldy, dep habarlaıdy QazAqparat QR Syrtqy ister mınıstrligine silteme jasap.

Elimizdiń Syrtqy ister mınıstrliginiń usynysymen Nur-Sultan qalalyq aýmaqtyq saılaý komıssııasy 51 shet memlekettegi Qazaqstannyń ókildikteri janyna 65 saılaý ýchaskesin ashqan. Sheteldegi saılaý ýchaskeleriniń mekenjaıyn mfa.gov.kz jáne www.election.gov.kz. saıttarynan bilýge bolady.

Jalpy, eń iri saılaý ýchaskesi Qazaqstannyń Beıjińdegi Elshiligi janynan ashylyp otyr. Dál osy saılaý ýchaskesi 1 600-den astam saılaýshyny qabyldaýǵa qaýqarly. Al Tallındegi Qazaqstan Konsýldyǵy janynan ashylǵan ýchaskede nebári 14 adam daýys beredi.

Qytaıda Beıjiń qalasynan bólek Shanhaı, Gonkong jáne Úrimshi qalalarynda saılaý ýchaskeleri jumys isteıdi. Bul elde 2 myńnan astam Qazaqstan azamatynyń daýys beretindigi kútilip otyr. Reseıde de 1 600-den astam saılaýshy Máskeý, Sankt-Peterbýrg, Qazan, Omby Astrahan qalalaryndaǵy saılaý ýchaskelerinde daýys bere alady. Túrkııanyń Ankara, Ystanbul jáne Antalııa qalalarynda shamamen 1300 adamǵa saılaý ýchaskeleri jumys isteıdi.

Aldyn ala derekterge sáıkes, 9 maýsymda 13 myńnan astam Qazaqstan azamatynyń sheteldegi saılaý ýchaskelerinde daýys beretindigi kútiledi.

Aıta keterligi, Qazaqstan Respýblıkasynyń «Qazaqstan Respýblıkasyndaǵy saılaý týraly» 1995 jylǵy 28 qyrkúıektegi N 2464 Konstıtýtsııalyq zańynyń 24-baby 8-tarmaǵyna sáıkes, demalys úılerinde, sanatorıılerde, turaqty emdeý-profılaktıkalyq mekemelerinde, shalǵaıdaǵy jáne qatynasý qıyn aýdandarda ornalasqan azamattar turatyn mekenderde, alys mal sharýashylyǵy ýchaskelerinde, tergeý ızolıatorlary men ýaqytsha ustaý ızolıatorlarynda, sondaı-aq shet memleketterdegi Qazaqstan Respýblıkasynyń ókildikteri janynan, Qazaqstan Respýblıkasyna qaraıtyn jáne daýys beretin kúni júzýde júrgen kemelerde qurylǵan saılaý ýchaskeleri boıynsha saılaýshylardyń tizimderi atalǵan mekemelerdiń basshylary, tıisti ákimder, ókildikter basshylary men keme kapıtandary bergen derekter negizinde jasalady.

Ýaqytsha bolý oryndarynda (demalys úılerinde, sanatorıılerde, turaqty emdeý-profılaktıkalyq mekemelerinde, alys mal sharýashylyǵy ýchaskelerinde, tergeý ızolıatorlary men ýaqytsha ustaý ızolıatorlarynda, sondaı-aq Qazaqstan Respýblıkasynyń shet memleketterdegi ókildikteri janynan, Qazaqstan Respýblıkasynyń ıeligindegi jáne saılaý kúni júzýde júrgen kemelerde) qurylǵan saılaý ýchaskeleri boıynsha elektorat tizimderi daýys beriletin kúnniń aldyndaǵy kúndegi jaǵdaı boıynsha mindetti túrde naqtylanýǵa tıis.