Saılaý qarsańynda 20 óńirde Call ortalyq iske qosyldy

ASTANA. QazAqparat – Májilis saılaýy qarsańynda qazaqstandyqtar ózderin daýys berýshiler tiziminen aldyn ala teksere alady. Tolyǵyraq Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Áset Turysov aıtyp berdi, dep habarlaıdy QazAqparat tilshisi.

«Aldymen buqarany saılaý týraly habardar etý maqsatynda Egov.kz, E-ótinish portalynda banner jarııalandy. Sonymen qatar saılaý týraly banner eGov mobile, kaspi.kz jáne halyk bank mobıldi qosymshalarynda qoıyldy. Odan bólek, halyqqa qyzmet kórsetý ortalyqtarynda da saılaý týraly habar beretin banner ilindi. Bizdiń mınıstrlik jergilikti atqarýshy organdarmen birlesip 20 óńirde Call ortalyq uıymdastyrdy. Almaty qalasy jáne Qostanaı oblysy boıynsha ortalyq nómiri «1315», al qalǵan óńirler boıynsha «109» nómirine habarlasýǵa bolady», - dedi Áset Turysov Ortalyq saılaý komıssııasy otyrysy barysynda.

Vıtse-mınıstrdiń aıtýynsha, Call ortalyqqa habarlasyp saılaýǵa qatysty týyndaǵan suraqtarǵa jaýap alý múmkindigi bar.

«Sonymen qatar daýys berýshiler JSN (jeke sáıkestendirý nómiri) arqyly saılaý tiziminen ózin teksere alady. Ol úsh servıs arqyly júzege asyrylady, atap aıtqanda sailau.gov.kz, sailau2023.gov.kz www.gov.kz sailau. Sol sııaqty 6 naýryzda Kcell, Beeline jáne Tele2 abonentterin qoldanýshylarǵa jappaı push habarlama jiberiledi. Ol jerde «Óz saılaý ýchaskeńizdi bilińiz» degen mátin bolady jáne silteme kórsetiledi», - deıdi ol.

Aıta ketsek, búgin OSK kezekti otyrysy ótti. Jıynda belgili bolǵandaı saıası partııalardyń saılaýaldy debaty 16 naýryzda ótedi.

Sondaı-aq, Májilis saılaýyna 12 mln-nan astam daýys berýshiniń tirkelgeni týraly habarlaǵan edik.

26 aqpandaǵy jaǵdaı boıynsha Ortalyq saılaý komıssııasyna 12 032 550 daýys berýshi tirkelgen.

Odan bólek, OSK otyrysy barysynda daýys berý bıýlleteniniń kólemi ózgeretini aıtyldy.