Saılaý qarsańynda 8 zańbuzýshylyq anyqtaldy: Bas prokýratýra úndeý jasady

Konstıtýtsııalyq ókilettikter sheńberinde prokýratýra organdary Quryltaı depýtattaryn saılaýdyń barlyq kezeńinde zańdylyqtyń saqtalýyna joǵary qadaǵalaýdy júzege asyrýdy jalǵastyryp keledi.

Saılaý qarsańynda 8 zańbuzýshylyq tirkeldi

Erlan Ótegenovtiń sózinshe, búgingi tańda prokýratýra organdary saılaý zańnamasyn buzýdyń 8 faktisin tirkedi, onyń ishinde 3 fakt — saılaýǵa baılanysty qoǵamdyq pikirge saýal salýǵa jáne 5 fakt — tyıym salynǵan kezeńde úgit júrgizýge baılanysty.

— Ákimshilik jaýaptylyqqa prokýrorlar qysqartylǵan tártippen jeti jeke tulǵany jáne bir zańdy tulǵany tartty. Olardyń barlyǵy kinásin moıyndady, áreketterine ókindi jáne onlaın-platformalardaǵy zańsyz jarııalanymdaryn joıdy, — dedi ol.

22 jáne 23 tamyzda saılaý aldyndaǵy úgitke tyıym salynady

Bas prokýrordyń orynbasary QR «Qazaqstan Respýblıkasyndaǵy saılaý týraly» Konstıtýtsııalyq zańynyń 27-baby 2-tarmaǵyna sáıkes saılaý aldyndaǵy úgit 2026 jylǵy 22 tamyzda, saǵat 00:00–de aıaqtalatynyn eske saldy. 

— QR «Qazaqstan Respýblıkasyndaǵy saılaý týraly» Konstıtýtsııalyq zańynyń 32-baby 1-tarmaǵyna sáıkes daýys berý kúni jáne onyń aldyndaǵy kúni, ıaǵnı 2026 jylǵy 22 jáne 23 tamyzda kez kelgen saılaý aldyndaǵy úgitke tyıym salynady.  Osyǵan baılanysty saılaý komıssııalarynyń úı-jaılarynan jáne daýys berýge arnalǵan úı-jaılardan tys jerlerde burynnan ilýli turǵan baspa úgit materıaldaryn sol oryndarynda qaldyrýǵa bolady. Sol sııaqty ınternet jelisinde buryn ornalastyrylǵan úgit materıaldaryn burynǵy oryndarynda qaldyrýǵa bolady. Bul rette, buryn ornalastyrylǵan materıaldardy ınternet-resýrstardyń basty betterine shyǵarýǵa jol berilmeıdi. Sondaı-aq toltyrylǵan bıýlletendi foto- jáne (nemese) beınetúsirilimge túsirýge jáne ony daýys berý kúni taratýǵa tyıym salynady, — dep eskertti vedomstvo basshysynyń orynbasary.

Onyń aıtýynsha, osy quqyqtyq shekteýler saqtalmaǵan jaǵdaıda úgit júrgizýge tyıym salynǵan kezeńde ony júrgizgeni úshin QR Ákimshilik quqyq buzýshylyq týraly kodeksiniń 102-baby boıynsha ákimshilik jaýapkershilikke tartylýy múmkin. Atap aıtqanda jeke tulǵalarǵa — 15, shyǵyn kásipkerlik sýbektilerine nemese kommertsııalyq emes uıymdarǵa — 20, orta kásipkerlik sýbektilerine — 25, iri kásipkerlik sýbektilerine — 35 aılyq eseptik kórsetkish mólsherinde aıyppul salýdy kózdeıdi.

Saýalnama, beıbit jıyn jáne jalǵan aqparatqa qatysty talaptar kúsheıtiledi

Saılaý týraly zańǵa sáıkes daýys berý kúnine deıingi bes kúnde jáne saılaý kúni BAQ pen onlaın-platformalarda qoǵamdyq pikir saýalnamalarynyń nátıjelerin, saılaý qorytyndysynyń boljamdaryn jáne kandıdattar men saıası partııalarǵa qatysty basqa da zertteý nátıjelerin jarııalaýǵa bolmaıdy.

— Sondaı-aq saılaý kúni daýys berýge arnalǵan úı-jaıda nemese pýnktte qoǵamdyq pikirge saýal salýǵa tyıym salynady. Kórsetilgen quqyqtyq talaptardy buzý QR Ákimshilik quqyq buzýshylyq týraly kodeksiniń 120-babynyń 2-bóligi boıynsha ákimshilik jaýaptylyqqa ákep soǵady (jeke tulǵalarǵa — 10, zańdy tulǵalarǵa — 25 aılyq eseptik kórsetkish mólsherinde aıyppul), — deıdi Erlan Ótegenov.

Sonymen qatar QR «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» Zańynyń erejelerin qatań saqtaý qajet, oǵan sáıkes jınalystardy, mıtıngilerdi jáne pıketterdi uıymdastyrý jáne ótkizý úshin habarlama jasaý tártibi, al demonstratsııalar men sherýler úshin kelisý tártibi kózdelgen.

— Joǵaryda kórsetilgen belgilengen tártipti buza otyryp ótkiziletin beıbit jınalystardy uıymdastyrǵany jáne olarǵa qatysqany úshin QR Ákimshilik quqyq buzýshylyq týraly kodeksiniń 488-baby boıynsha aıtarlyqtaı merzimge qamaqqa alýǵa deıingi jaza kózdelgen. Eger bul áreketter azamattardyń, uıymdardyń, qoǵamnyń nemese memlekettiń quqyqtary men zańdy múddelerine eleýli zııan keltirýmen ushtassa, qylmystyq jaýaptylyq týyndaıdy (QK-niń 400-baby), — dep eskertti bas prokýrordyń orynbasary.

Erlan Ótegenov mass-medıada jalǵan málimetter men quqyqqa qaıshy kontenttiń taratylýyna erekshe nazar aýdardy. Onyń sózinshe, ol úshin qaýiptilik dárejesine jáne keltirilgen zııanǵa qaraı Qylmystyq kodekstiń 274-baby boıynsha qylmystyq jaýaptylyq ta, Ákimshilik quqyq buzýshylyq týraly kodekstiń 456-2-baby boıynsha ákimshilik jaza da kózdelgen.

QR Bas prokýratýrasy zańdylyqty qamtamasyz etý jáne quqyq buzýshylyqtardyń aldyn alý maqsatynda saılaý protsesiniń barlyq qatysýshysyn atalǵan zań talaptaryn saqtaýǵa jáne quqyqqa qaıshy áreketterge jol bermeýge shaqyrady.

Budan buryn Quryltaı saılaýy kúni 16 saǵattyq jalpyulttyq online-marafon ótetinin jazǵanbyz.