Saılaý: Qaraǵandyda qoǵamdyq baıqaýshylarǵa arnalǵan oqytý semınary ótti

QARAǴANDY. QazAqparat - Qaraǵandy qalasynyń Dostyq úıinde 10 qańtarda ótetin QR Parlamenti Májilisi men máslıhattary depýtattarynyń saılaýyna daıyndyq boıynsha qoǵamdyq baıqaýshylarǵa arnalǵan oqytý semınary ótti, dep habarlaıdy QazAqparat.

Oqytýda oblystyq kásipodaqtar ortalyǵy, Qaraǵandy oblysy azamattyq alıansy, «Qazaqstan azamattary», «Jarqyn bolashaq» jáne ózge de úkimettik emes uıym ókilderi, táýelsiz baıqaýshylar qatysty. Baıqaýshylardyń negizgi mindeti – saılaýdyń ádildigi men adaldyǵyna yqpal etý. Olar úshin ashyqtyq, aıqyndyq jáne obektıvti baǵalaý – basty qaǵıdat.

Baıqaýshylarǵa kelesi máseleler túsindirildi: saılaý quqyǵy, saılaý organdarynyń júıesi men quzyreti, daýys berý kúni saılaý komıssııasynyń qyzmetin uıymdastyrý, qoǵamdyq birlestikterden kelgen baıqaýshylardyń ókilettikteri, quqyqtary men mindetteri, baıqaýshylardyń jumysynyń qaǵıdattary týraly, daýys berý tártibi men ony uıymdastyrý, daýys berýdi ótkizý, saılaý ýchaskesinde daýystardy sanaý rásimi jáne baıqaýshylardyń qatysý jáne daýystardy sanaýdy baqylaý quqyǵy, Qazaqstan Respýblıkasynyń saılaý týraly zańnamasyn buzǵany úshin ákimshilik jáne qylmystyq jaýaptylyq.

Semınarǵa kelgen «Qazaqstan azamattary» QB-niń dırektory Dmıtrıı Poltorenkonyń aıtýynsha, saılaý - bul ár azamattyń qurmetti quqyǵy, árkim óziniń daýysynyń mańyzdy ekenin, tańdaý jasaı alatyndyǵyn túsinýi kerek. Al, árbir baıqaýshy tarapynan birinshi mindet - árbir azamattyń konstıtýtsııalyq quqyǵyn barynsha qolaıly jaǵdaılarda qamtamasyz etý bolýy tıis.