Saılaý qalypty ótýde, halyqtyń belsendiligi joǵary - №117 saılaý ýchaskesiniń tóraıymy R. Bólekbaeva
ALMATY. 15 qańtar. QazAqparat /Názıra Eleýhan/ - Almaty qalasy Áýezov aýdany №117 saılaý ýchaskesinde saılaý qalypty ótýde.
Aýdan turǵyndarynyń da, el irgesin ustar jastardyń da belsendiligi joǵary. Bul týraly №117 saılaý ýchaskesiniń tóraıymy Raıhan Bólekbaeva málim etti.
"Bizdiń ýchaske de tańǵy 07:00-den bastap, óz jumysyn bastady. Saılaýshylar úshin barlyq jaǵdaı jasalǵan. Olardyń daýys berý barysyn táýelsiz baıqaýshylar jiti baqylaýda. Bizdiń saılaý ýchaskesi boıynsha barlyǵy 2183 saılaýshy bar. Onyń ishinde úsheýi issaparlaryna baılanysty kele almaıtyndyǵy týraly aryz berip ketti, 11-i densaýlyǵyna baılanysty úıde daýys beredi, jazylǵan aryzdary bar. Tańerteńnen árbir kelgen saılaýshylarymyz óziniń qalaǵan kandıdattaryna daýys berip jatyr. Osy saǵatta saılaýshylardyń 150-i kelip, daýys berip ketti. Saılaý ýchaskesi tynysh, óte jaqsy jaǵdaıda ótip jatyr. Halyq kóńildi, halyqqa eshqandaı qysym jasalyp jatqan joq",-dedi ol.
"Saılaýǵa kelý árbir azamattyń azamattyq boryshy bolýy kerek dep sanaımyn. Sondyqtan da búgingi saılaýǵa kelip, daýysymdy berdim. Biz úshin eń bastysy, halyq jaqsy ómir súrip, elimiz aman, jurtymyzdyń tynysh bolýy ",-deıdi aýdan turǵyny Qanat Nurǵazıev.
Esterińizge sala ketsek, Almatyda 472 ýchaskelik, 37 okrýgtik, 7 aımaqtyq saılaý komısııasy bar. Qala boıynsha saılaýshylardyń jalpy sany 960 myńdaı. Árbir ýchaskede shamamen 1,5-2,5 myń adam daýys beredi.
