Saılaý halyqtyń saıası saýatyn arttyrady – Taıyr Nyǵmanov

Saılaý kóp ótken saıyn partııalar jumysyn kórsetýge mol múmkindik alady. Mundaı pikirdi saıasattanýshy Taıyr Nyǵmanov bildirdi, dep habarlaıdy Kazinform.

«Meniń jeke pikirim, qazirgi Qazaqstandaǵy eń úlken problemalardyń biri - saıası saýattylyqtyń jetispeýshiligi. Bul azamattardyń belgili bir problemany naqty qaı organnyń ne ınstıtýttyń sheshetinin jete bile bermeýine baılanysty. Muny Májilis saılaýynan da baıqaýǵa bolady. Depýtattardan aıtalyq, úıiniń janyndaǵy jolǵa, mektepke, aýrýhanaǵa qatysty surap jatady. Alaıda, qalaı desek te depýtattyń negizgi qyzmeti depýtattyq saýal joldaý emes, zań shyǵarmashylyq protsesi. Degenmen, ol da mańyzdy qural. Bizde aýdan, qala, oblys ákimderin, Májilis, máslıhat depýtattaryn saılaý kóp bolǵan saıyn adamdar da qaı organǵa qandaı quzireti júktelgenin jete túsine bastaıdy», - dedi ol agenttik tilshisine bergen suhbatynda. 

Onyń atap ótýinshe, bul adamdardyń bılikpen ózara qarym-qatynas jasaýy úshin óte jaqsy.

«Saıası saýattylyq joǵary bolǵan saıyn saılaý da jaqsy ótedi. ıAǵnı, baǵdarlamasy qazaqstandyqtardyń basym bóliginiń múddesine saı keletin kandıdat jeńiske jetedi. Qazaqstan azamattary da ózderiniń qajettiligine qaraı suranystaryn durys túzýdi úırenedi. Ókinishke qaraı, «bárin qatyramyn» degen popýlıstik urandy da estýge bolady ári áli de bolsa sonyń dáýreni júrip tur. Ótken jyldary «Partııalar túk istemeıdi. Parlamenttik ne prezıdenttik saılaý qarsańynda kandıdat usyný úshin 5 jylda bir ret oıanyp, odan keıin qaıtadan 4 jylǵa uıqyǵa ketedi» degen syndy jıi estıtin edik. Al saılaý kóp bolsa, onda partııalarǵa da óz jumystaryn kórsetýge múmkindik mol bolar edi», - dedi Taıyr Nyǵmanov.