Saılaý eldi bóletin emes, biriktiretin naýqan bolýy kerek - Prezıdent

ASTANA. QazAqparat - Bizdiń «Ártúrli kózqaras, birtutas ultqa» negizdelgen qaǵıdatymyz myzǵymaıdy. Saıası radıkalızm men ekstremızmniń kez kelgen túrine elimizde oryn joq. Bul týraly Prezıdent Qasym-Jomart Toqaev senat otyrysynda aıtty, dep habarlaıdy QazAqparat.

«Demokratııa – bul, eń aldymen, óz sóziń men isińe jaýapkershilikpen qaraý. Bárimiz bir shańyraq astynda ómir súrip jatyrmyz. Sondyqtan árbir azamat, kez kelgen qoǵam qaıratkeri, barsha saıası kúsh el bolashaǵy úshin óziniń tikeleı jaýapkershiligin sezinýi qajet.

Barsha otandastaryma aıtarym: álemde buryn-sońdy bolmaǵan kúrdeli geosaıası ahýal kezinde elimizdiń tynyshtyǵy men yrys-berekesin saqtaý tek ózimizge, birligimiz ben yntymaǵymyzǵa baılanysty. Táýelsizdigimizdi saqtaý jáne ony nyǵaıtý asa mańyzdy mindet ekenin taǵy da eske salamyn. Bul – halqymyzdyń basty qundylyǵy», - dedi Memleket basshysy.

Onyń aıtýynsha, biz konstrýktıvti reforma baǵytymen alǵa qaraı nyq qadam basyp, memlekettiligimizdi nyǵaıtyp, qoǵamdy biriktirý úshin qoldan kelgenniń bárin jasaýymyz kerek. Saıası jaýapkershiliktiń bıik mádenıeti men azamattarymyzdyń shynaıy patrıotızmi munyń kepili bola alady. Árqaısymyz ózara tileýlestik qaǵıdatynan aınymaýymyz kerek. Sonda ǵana teń múmkindikter men damýdy tý etken Ádiletti Qazaqstandy quramyz.

«Birneshe aptadan keıin saıası naýqan bastalady. Kandıdattar úgit-nasıhat jumysyna kirisedi. Olar daýys jınaý úshin túrli tásilderdi qoldanady. Bul – qalypty demokratııalyq úderis.

Qazaqstanda pikir alýandyǵyna eshqandaı shekteý qoıylmaıdy. Zańǵa qaıshy kelmeıtin barlyq is-áreketke ruqsat beriledi. Degenmen, bir nárseni bárimiz qaperde ustaýymyz kerek. Saılaý eldi bóletin emes, biriktiretin naýqan bolýy kerek.

Taǵy da aıtqym keledi: úmitkerler qoǵamǵa iritki salatyn áreketten aýlaq bolǵany jón. Ańdamaı aıtylǵan artyq sóz nemese oılanbaı jasalǵan oqys qadam búkil eldiń bolashaǵyna kesirin tıgizedi. Árbir otandasymyz osyny durys túsinýge tıis», - dedi Qasym-Jomart Kemeluly.