Saılaý eldegi ózgeristerge jańa serpin beredi – Erlan Qarın

ASTANA. QazAqparat – Memlekettik keńesshi Erlan Qarın búgingi saılaýdan keıin elde bolatyn saıası reformalar men ózgeristerge qatysty pikir bildirdi, dep habarlaıdy QazAqparat tilshisi.

«Saılaýdan keıin eldegi reformalardyń ári qaraı jalǵasqanyn kútemiz. Sebebi bul saılaý da júzege asyp jatqan reformalardyń jalǵasy. Búgingi saılaý eldegi bolyp jatqan ózgeristerge serpin beredi. Sonymen qatar halyqtyń memlekettik sheshim qabyldaý protsesine keńirek tartylýyna jaǵdaı jasaıdy dep oılaımyn. Bir mandattyq okrýg boıynsha kandıttardyń saılaýǵa túsýi bıyl engizilip otyrǵan jańashyldyq. Bul azamattardyń saılaýǵa túsý múmkindikterin keńeıtti. Ózderińiz bilesizder, buǵan deıin partııa músheleri ǵana saılaýǵa túse alatyn edi», - dedi Erlan Qarın daýys bergen soń BAQ ókilderiniń saýalyna jaýap bere turyp.

Onyń aıtýynsha, aralas saılaý júıesin engizý negizinde qarapaıym adamdar baǵyn synaı alady.

«Bul elimizdegi saılaý júıesiniń keńeıýiniń, tańdaýdyń belgisi. Májilis pen jergilikti máslıhattarǵa jańa tulǵalar paıda bolady. Bul aldaǵy ýaqytta qabyldanatyn sheshimderdiń sapasyn arttyrýǵa, saıası saladaǵy qoǵamdyq-saıası múddelerdiń ókildigin keńeıtýge yqpal etedi», - deıdi ol.

Buǵan deıin Memlekettik keńesshi Erlan Qarınniń elordadaǵy №111 saılaý ýchaskesinde daýys bergeni týraly habarlaǵan edik.