Saılaý: Dene qyzýy kóterilip turǵan almatylyqtar qalaı daýys beredi

ALMATY. QazAqparat – Saılaýǵa barǵan azamattyń dene qyzýy kóterilip turǵan jaǵdaıda onyń qalaı daýys beretinin Almaty qalasynyń bas memlekettik sanıtar dárigeri Jandarbek Bekshın onlaın brıfıngide túsindirdi, dep habarlaıdy QazAqparat tilshisi.

Onyń sózinshe, árbir saılaý ýchaskesiniń aldynda daýys berýshilerdiń dene qyzýy tekseriledi.

«Eger daýys berýshiniń dene qyzýy kóterilip tursa, onyń saılaý ýchaskesine kirýine tyıym salynady. Jedel járdem kezekshilikte bolady. Dene qyzýy kóterilip turǵan adamdy statsıonarǵa aparady, qajet bolǵan jaǵdaıda aýrýhanaǵa jatqyzady. Medıtsınalyq mekemelerde arnaıy bólme daıyndalǵan. Sol jerde daýys berýge bolady», - dedi Jandarbek Bekshın.

Óz kezeginde, Qoǵamdyq densaýlyq saqtaý basqarmasynyń basshysy Narıman Tabynbaev saılaý ýchaskelerinde medıtsına qyzmetkerleri bolatynyn jáne daýys berýshilerdi baqylap otyratyn arnaıy bólme daıyndalǵanyn jetkizdi.

«Daýys berýshiniń dene qyzýy kóterilgen jaǵdaı ony sol bólmege aparyp, dárigerler teksergennen keıin jedel járdem kóligimen alyp ketedi. Biz arnaıy aýrýhana daıyndap qoıdyq, sol jerde naýqastar PTR-testiniń nátıjesi shyqqanǵa deıin bolady. Sol bólmelerde daýys bere alady», - dep qosty ol.