Saılaý: daýys berý kúninde Braıl shrıftimen trafaretter qoldanylady

ASTANA. QazAqparat Osy jyldyń 20 qarashasynda ótetin kezekten tys prezıdent saılaýynda Braıl shrıftimen trafaretter qoldanylady. Bul týraly QR Ortalyq saılaý komıssııasynyń múshesi Anastasııa Şegortsova aıtty, dep habarlaıdy QazAqparat tilshisi.

«2022 jylǵy 22 qyrkúıekte júrgizilip jatqan jumystardy jetildirý maqsatynda EQYU DIAQB sarapshylarymen onlaın-konsýltatsııa ótkizildi. Múgedektigi bar adamdar úshin qolaıly jaǵdaı jasaý úshin halyqaralyq standarttar men EQYU elderiniń úzdik halyqaralyq tájirıbesi egjeı-tegjeıli qaraldy», - dedi ol Ortalyq saılaý komıssııasy janyndaǵy múmkindigi shekteýli azamattardyń quqyqtaryn qorǵaý jónindegi jumys tobynyń otyrysynda.

Onyń aıtýynsha, Ortalyq saılaý komıssııasy jumys toby músheleriniń, múddeli memlekettik organdar men qoǵamdyq birlestikterdiń múgedek adamdardyń tarapynan saılaý quqyqtaryn qamtamasyz etýge qatysty kelip túsken usynystaryn zerdeledi. Barlyǵy 30-ǵa jýyq usynys tústi. Olardyń keıbireýi daýys berýge arnalǵan úı-jaıdy jaraqtandyrý, sondaı-aq múgedek azamattardyń saılaý quqyqtaryn qamtamasyz etý jónindegi jumysqa eriktilerdi, ym-ıshara tili mamandaryn tartý máselelerin jan-jaqty qarastyrady.

«Braıl shrıftin paıdalana otyryp, kórý qabileti buzylǵan adamdar úshin trafaretterdi ázirleý týraly usynys eskerildi», - dedi Anastasııa Şegortsova.