Saılaý da, referendým da eń aldymen elimizdiń amandyǵyna, turmystyń jaqsarýyna qyzmet etýi tıis - Q.Sultanov
ASTANA. 6 qańtar. QazAqparat /Aıdar Ospanalıev/ - «Saılaý da, referendým da eń aldymen elimizdiń amandyǵyna, táýelsizdigimizdiń beriktigine, turmystyń jaqsarýyna qyzmet etýi tıis»,-deıdi senator Qýanysh Sultanov.
Bul týraly ol búgin Parlament Senatynyń jalpy otyrysynda bir top depýtattardyń Elbasynyń ókilettigin uzartýǵa qatysty usynysyn talqylaý barysynda málim etti.
Onyń sózine qaraǵanda, ótken jyl elimizdiń rýhanı birligin, tutastyǵyn, yntymaqtastyǵyn bekitip, damýdyń jańa sapasyna kóterilgen, eldiń mártebesi órlep, álemdik deńgeıde tanylǵan jyl boldy. Bul Elbasy Nursultan Nazarbaevtyń bastamasymen qol jetkizilip otyrǵan ıgilik. «Osy ıgiliktiń nátıjesinde dúnıejúzilik qoǵamdastyq aldynda memleketimizdiń abyroıy ósip, memlekettik qaýipsizdigimiz nyǵaıdy. Jańa dáýirdegi memlekettigimizdiń barlyq jetistikteri men jemisteri tuńǵysh Prezıdentimizdiń qaıratkerlik eńbegimen baılanysty»,-dedi Senat depýtaty.
Onyń pikirinshe, búginde elde Qazaqstan - N.Nazarbaev degen egiz uǵym qalyptasyp otyr. Elbasy elimizdi eń qıyn degen ári tuıyqqa tirelgen tyǵyryqtan shyǵara bilip, Qazaqstandy tarıhy shyńyna kóterdi. Elbasynyń is-áreketi, tapqyrlyǵy men kóregendigi, ozyqtyǵy el múddesine qyzmet etýde. «Aldymyzdaǵy gúldengen, órkendegen dúnıejúzilik básekege laıyq Qazaqstanda ómir súrý maqsatyna bet alǵan uly sapardy da óziniń 2020 jylǵa deıingi baǵdarlamasynda jarııalap, N.Nazarbaev bastady. Onyń jemisti, nátıjeli bolýy halyqtyń qamy, qoǵamnyń suranysy. Biz bárimiz de sol maqsattarǵa jetip, sony kózimizben kórýge múddelimiz»,-dedi depýtat.
