Saılaý: BQO-da baıqaýshylarmen kezdesý ótti

ORAL. QazAqparat – Búgin Batys Qazaqstan oblysy boıynsha saılaýaldy partııalyq emes baqylaý ortalyǵynyń basshysy, «Nur» balalar úıi men mektep-ınternattary túlekteriniń Batys Qazaqstan Odaǵy» qoǵamdyq birlestiginiń tóraǵasy Gennadıı Frank Batys Qazaqstan oblystyq saılaý komıssııasynyń múshelerimen kezdesti, dep habarlaıdy QazAqparat.

Atalǵan sharaǵa «Batys Qazaqstan oblysy Kásipodaqtar ortalyǵy» aýmaqtyq kásipodaqtar birlestiginiń tóraıymy Aıgúl Esekenova, «Batys Qazaqstan oblystyq Azamattyq Alıansy» qaýymdastyǵy zańdy tulǵalar birlestiginiń tóraıymy Svetlana Tenısheva qatysty.

Oblystyq saılaý komıssııasynyń tóraǵasy Ǵaısa Qapaqov mundaı kezdesýlerdiń mańyzdylyǵyn atap ótti. Sondaı-aq ol baıqaýshylardy Qazaqstan Respýblıkasy Parlamenti Májilisiniń jáne máslıhattar depýtattaryn saılaý boıynsha aǵymdaǵy saılaý naýqanynyń negizgi kezeńderimen, atqarylǵan jumystarmen tanystyrdy.

Óz kezeginde, BQO boıynsha saılaýaldy partııalyq emes baqylaý ortalyǵynyń basshysy Gennadıı Frank búgingi kezdesý úshin alǵysyn bildirdi. Barlyq baıqaýshylar berilgen múmkindikti paıdalana otyryp, aǵymdaǵy saılaýǵa daıyndyq jáne ony ótkizýge qatysty túrli suraqtar qoıdy.