Saılaý: Bes saıası partııanyń músheleri teledebat ótkizdi

NUR-SULTAN. QazAqparat – «Qazaqstan» ulttyq arnasynda aldaǵy saılaýǵa qatysatyn bes saıası partııanyń músheleri teledebat ótkizdi, dep habarlaıdy QazAqparat tilshisi.

Teledebatqa «Aýyl» partııasynyń atynan Dáýletkereı Kápuly, «Nur Otan» partııasynyń atynan Aıdos Sarym, «Aq jol» partııasynyń atynan Berik Dúısenbınov, «Adal» partııasynyń atynan Maqsat Tolyqbaı, Qazaqstan halyq partııasynan Ǵazız Qulahmetov qatysty.

Teledebat birneshe kezeńge bóline uıymdastyryldy. Alǵashqy kezeńde partııa ókilderi óz atynan baǵdarlamalaryn tanystyryp, telejúrgizýshiniń suraǵyna jaýap berdi. Bul kezeńde partııanyń ókilderi saılaýshylarǵa shaǵyn úgit-nasıhat júrgizip, óz baǵdarlamalarynyń basymdyqtaryn atady.

Ekinshi kezeńde partııalardyń ókilderi bir-birine suraq qoıdy. Atap aıtqanda, ulttyq qundylyqtardy saqtaý, eýropalyq ómir saltyn kiriktirý, dekommýnızatsııa, analar men balalarǵa qarsy qylmysty toqtatý, jemqorlyqpen kúres máselelerine qatysty saýaldar joldandy. Atalmysh kezeńde ókilder suraqtarǵa shama-sharqynsha jaýap berýge tyrysty.

Úshinshi kezeńde partııalardyń ókilderi halyq tarapynan qoıylǵan suraqtarǵa jaýap berdi. Tórtinshi kezeńde olarǵa halyqqa úndeý jasaý úshin ýaqyt berildi.