Saılaý baıqaýshylaryna semınar ótip jatyr
ASTANA. QazAqparat - Búgin elordadaǵy «Qazmedıa» ortalyǵynda «Saılaýǵa baqylaý júrgizýdiń amaldary men ádisteri» taqyrybynda semınar trenıng ótýde.
Sharany Qazaqstan Respýblıkasyndaǵy Prezıdent saılaýyn baqylaý jónindegi respýblıkalyq qoǵamdyq komıssııa uıymdastyryp otyr.
«Biz óz baıqaýshylarymyzdyń sanyn on myńǵa adamǵa jetkizýdi aldymyzǵa maqsat etip otyrmyz. Barlyq oblystarda qazirgi ýaqytta shtabtarymyz quryldy jáne aımaqtaǵy komıssııa músheleri semınar uıymdastyrýda», - dedi atalǵan respýblıkalyq komıssııa múshesi Vladımır Telnov.
Onyń atap ótýinshe, búgingi semınarǵa elordalyq baıqaýshylardyń tek bir bóligi ǵana qatysýda.
«Óıtkeni biz árbir saılaý ýchaskesinde óz baıqaýshylarymyzdyń bolýyn josparlaýdamyz. Sondyqtan búgingideı trenıngter Qazaqstannyń barlyq óńirinde uıymdastyrylady», - dedi ol.
Semınardyń basty maqsaty respýblıkalyq komıssııa mıssııasy men mindetterin túsindirip, baqylaý protsessin jetildirý bolyp sanalady. Semınar barysynda saılaý naýqanyndaǵy baıqaýshylardyń negizgi róli, baıqaý júrgizý barysynda aqparattyq tehnologııalardy paıdalaný týraly máseleler talqylanýda.
