Saılaý: Baıqaýshylardyń Ádep kodeksi ázirlendi

ASTANA. QazAqparat – Elimizde ótetin kezekten tys prezıdent saılaýyna oraı baıqaýshylardyń Ádep kodeksi ázirlendi. Bul týraly Partııalyq emes baıqaý ortalyǵynyń tóraǵasy Tólegen Kúnádilov aıtty, dep habarlaıdy QazAqparat tilshisi.

«Baıqaýshylardyń Ádep kodeksi ázirlendi. 3 qarashada barlyq seriktesterimizdiń, kandıdattardyń respýblıkalyq shtab ókilderiniń basyn qosýdy josparlap otyrmyz. Jalpy, tájirıbede baıqaýshylardyń ózderi zań buzýshylyqqa jol beretini kezdesedi. Aldaǵy ótetin kezdesýde atalǵan qujatty talqylap, qabyldaýdy kózdep otyrmyz. Odan keıin ony jumys isteý úshin Ortalyq saılaý komıssııasyna jiberemiz», - dedi Tólegen Kúnádilov elordada ótken brıfıng barysynda.

Ol baıqaýshylar zańdylyq pen ashyqtyqty saqtap, barlyq kandıdatqa beıtarap bolýy tıistigin basa aıtty. Sonymen qatar sońǵy ýaqytta baıqaýshylar tarapynan saılaý úderisine qyzyǵýshylyq artyp kele jatqanyn erekshe atap ótti.

«Eger 2010 jylǵy saılaýǵa 29 myń adam baıqaýshy retinde qatyssa, 2019 jyly olardyń sany 45 myńǵa jetti. Al 2021 jyly ótken parlamenttik saılaýǵa 74 myń baıqaýshy tirkeldi. Qoǵamnyń qyzyǵýshylyǵy artyp keledi. Azamattyq qoǵam baıqaýshy retinde kóp qatysqan saıyn azamattardyń tańdaýy zańmen qorǵala túsedi», - dedi ortalyq tóraǵasy.