Saılaý: Baıqaýshylar men komıssııa músheleri koronavırýsqa test tapsyrady
Onyń aıtýynsha, saılaý aıasynda 10 qańtarda bas sanıtar dárigerdiń qaýlysy jarııalanady.
Qazirgi ýaqytta onyń formaty talqylanyp jatyr. Sonyń qorytyndysy boıynsha sharalardyń negizgi úsh sanaty qabyldanady.
«Alǵashqy sanat saılaýdy uıymdastyrý isine baǵyttalǵan. Ekinshisi – saılaýshylarǵa qoıylǵan talaptar. Úshinshisi – saılaý kúni saılaý ýchaskesinde kúni boıy bolatyn adamdarǵa qatysty talaptar. Nysanǵa qatysty talaptar, baılanyssyz termometrııa, adamdar aǵymyn retteý, áleýmettik aralyq, mindetti maskalyq rejım men sanıtaızerlerdi paıdalaný sekildi erejeler esepke alynady. Saılaýshylarǵa qoıylatyn talaptar – búkil azamattarǵa qoıylatyn sol burynǵy talaptar bolyp qala beredi. Atap aıtqanda, mindetti túrde maska kııý, antıseptık sebýdi umytpaý, áleýmettik araqashyqtyqty saqtaý talaptary», - dedi Aıjan Esmaǵambetova OKQ-da ótken baspasóz máslıhatynda.
Sonymen qatar saılaý ýchaskesinde bolatyn adamdarǵa qoıylatyn naqty talaptar bar. Aıjan Esmaǵambetovanyń aıtýynsha, bul adamdar koronavırýs testinen ótýge tıis.
«Qazirgi tańda elde epıdemıologııalyq ahýaldyń turaqsyzdyǵyn esepke ala otyryp, óńirler birde «sary», birde «qyzyl» aımaqta turǵanyn kórip otyrmyz. Bul degenińiz ahýaldyń turaqsyzdyǵyn aıǵaqtaı túsedi. Sol sebepti saılaý ýchaskesinde bolatyn azamattardyń bárin de mindetti testileýden ótkizý máselesi kóterilýde. Sonymen qatar test aımaqtyń qyzyl nemese sary aımaqta turǵanyna qaramastan ótkiziledi. Qazirgi tańda biz epıdahýal matrıtsasyn aımaqtar turǵysynda ǵana emes, aýdandar turǵysynda da sala bastadyq. 25 jeltoqsannan bastap saılaý kúnine deıin baıqaýshylar men senimdi ókilder PTR-testtiń teris nátıjesin kórsetýi kerek», - dedi Aıjan Esmaǵambetova.
Aıjan Esmaǵambetova saılaý ýchaskesindegi azamattar testiden tegin óte alatynyn málim etti.
