Keı elder bizdiń memleket bolyp ketetinimizge kúmánmen qaraǵan - Saılaý Batyrshauly
Búgin Astanada Respýblıka kúnine oraı SöZ pikirtalas alańynyń jańa maýsymy bastaldy. Onda qoǵamda bolyp jatqan jaǵdaılarǵa qatysty ashyq pikir bildirýge múmkindik bar. Atalǵan is-shara qoǵamdyq mańyzy bar jobalardy qoldaıtyn Orta Community keńistiginde ótti. Ortalyqtyń ashylýy da merekege tuspa-tus túsip, qonaqtarǵa merekelik kóńil-kúı syılady, dep habarlaıdy Kazinform.
Birinshi dáris «Egemen kún: Qazaqstan qalaı erkin boldy» dep atalatyn ashyq suhbat formatynda bastaldy. Elimizdiń bostandyqqa qandaı qıyn joldarmen jetkeni jóninde sóz qozǵaldy.
Oǵan spıker retinde QR dıplomatııalyq qyzmetiniń ardageri, L. N. Gýmılev atyndaǵy EUÝ professory Saılaý Batyrshauly jáne Parlament Májilisiniń depýtaty, pýblıtsıst Nıkıta Shatalov qatysty.
Al alańǵa kelgen qonaqtar óz kezeginde suraqtaryn jaýdyrdy.
Saılaý Batyrshauly Qazaqstannyń BUU qataryna kirýge alǵashqy umtylysy jaıynda eske alyp, kúrsine baıandap berdi.
«25 qazanda atap ótiletin Respýblıka kúni — Táýelsizdik alýmen qatar qazirgi Qazaqstannyń mańyzdy kúnderiniń biri. 1990 jyly 25 qazanda Joǵarǵy Keńes Qazaq KSR Memlekettik Egemendigi týraly Deklaratsııa qabyldady. Bul Qazaqstannyń bostandyq jolyndaǵy alǵashqy qadamy boldy. Qazaqstan halyqaralyq qatynastardyń tolyqqandy sýbektisine aınaldy jáne óziniń kópten kútken Táýelsizdik jolyn bastaǵaly tur dep búkil álemge jarııa etildi. Al 1991 jyly Nıý-Iorkte BUU Bas Assambleıasynyń sessııasynda „Qazaqstan egemen memleket retinde BUU-ǵa múshe bolatyn ýaqyty keldi, onyń jarǵysynda: „biz, Birikken Ulttar Uıymynyń halyqtary, úlken jáne kishi ulttar quqyqtarynyń teńdigine degen senimdi bekitýge bel býdyq“, — dedi ardager.
Saılaý Batyrshauly pikirtalas alańynyń otyrysynda Respýblıka kúniniń mańyzyn atap ótti.
«Táýelsizdiktiń alǵashqy jyldary keı elder bizdiń memleket bolyp ketýimizge senimsizdikpen qarady. Ol kezde dıplomatııalyq qarym-qatynasty ornatý mańyzdy bolǵandyqtan, onyń qalyptasýyna úlesimdi qostym. Sebebi halyq Egemendigi týraly deklaratsııa negizinde ǵana ózin memleket retinde qabyldaı alady», — dedi professor Saılaý Batyrshauly.
Oǵan qosa deklaratsııanyń basty artyqshylyqtaryn da tilge tıek etti.
«Deklaratsııanyń mańyzdy erejesi — Qazaq KSR halyqaralyq qatynastardyń derbes sýbektisi retinde áreket etý, syrtqy saıasatty óz múddesi úshin aıqyndaý, dıplomatııalyq jáne konsýldyq ókildiktermen almasý, halyqaralyq uıymdardyń, onyń ishinde BUU men onyń mamandandyrylǵan mekemeleriniń qyzmetine qatysý quqyqtaryn ózine bekitti. Halyqaralyq qatynastar ornatýdyń bastapqy núktesi boldy», — dep oıyn aıaqtady spıker.
SöZ Astana Public Talk pikirtalas alańynyń otyrysynda áıelderge dıplomatııaǵa barýǵa jol ashyq degen oı aıtylyp qaldy.
Áıelderdiń bedeli burynǵydaı emestigin aıtqysy kelgen telejýrnalıst Sandýǵash Sultan spıkerge suraǵyn qoıdy.
Dıplomatııalyq qyzmet ardageri áıelder dıplomatııaǵa buryn amalsyzdan qabyldanǵanyn, biraq qazir jaǵdaı aıtarlyqtaı ózgergenin aıtyp, telejýrnalıstiń sózin quptady.
«Áıelder empatııaǵa súıenetin jáne ortaq sheshimge kelýdi biletin áldeqaıda sheber dıplomat bola alady. Qazirgi ýaqytta dıplomatııadaǵy áıelder úshin barlyq joldar ashyq jáne basshylar olardyń qabiletine basa nazar aýdaryp, merıtokratııa qaǵıdattaryn ustanady», — dep sózin támamdady ardager.
