Saılaý ashyq, onyń qorytyndylaryna kúdiktenbeıtindeı jaǵdaıda ótti - ÚEU
ASTANA. 4 sáýir. QazAqparat /Jasulan Amanbaıuly/ - Saılaý ashyq, onyń qorytyndylaryna kúdiktenbeıtindeı jaǵdaıda ótti.
3 sáýir kúni elimizde ótke QR Prezıdentiniń kezekten tys saılaýyn baqylaý jónindegi Respýblıkalyq qoǵamdyq komıssııa» Respýblıkalyq qoǵamdyq birlestiginiń músheleri osyndaı málimdeme jasady.
Qoǵamdyq uıym búkil el boıynsha 5,8 myńǵa tarta erikti-baqylaýshylardy jumyldyrǵan. Olar saılaý ýchaskeleriniń 60 paıyzyn baqylady. «Biz baqylaǵan saılaý ýchaskelerinde daýys berýshilerdiń sany joǵary boldy. Shamamen 91,3 paıyzdy qurady. QR Prezıdentine saılaýshylardyń 94,9 paıyzy daýys berdi»,-dedi uıym múshesi Nurlan Erimbetov.
«Jalpy alǵanda saılaý Qazaqstan zańnamasynyń talaptaryna jáne jalpy moıyndalǵan demokratııalyq standarttarǵa sáıkes ótti. Bul ótken saılaýdy zańdy jáne ashyq dep tanýǵa múmkindik beredi»,-dep atap kórsetti ol.
«3 sáýirde ótken QR Prezıdentiniń kezekten tys saılaýy Qazaqstan halqynyń demokratııalyq ustanymdar qaǵıdattaryna umtylysyn, qoǵamnyń uıysýy men ulttyq birliktiń jańa deńgeıge kóterilip, azamattardyń elektoraldy jáne quqyqtyq mádenıetiniń óskendigin kórsetti. Buny qoǵamdyq komıssııanyń aldyn ala anyqtaǵan deregine sáıkes, jalpy saılaýshylardyń 91,3 paıyzy daýys bergendigi dáleldeıdi»,-dep málim etti uıym músheleri ózderiniń úndeýlerinde.
Osylaısha olar endi barlyq múddeli taraptardy saılaý qorytyndysyn dáleldi jáne ádil baǵalaýǵa, negizsiz, popýlıstik aıyptaýlar men málimdemeler jasamaýǵa shaqyrýda. Osydan bir aı buryn, saılaý aldynda qurylǵan uıymǵa elimizdiń S. Elýbaı, M. Áýezov, N. Erimbetov jáne basqa da tanymal qaıratkerler kirip otyr. Olar ózderiniń birlestikterin budan ári de keńeıtip, eldegi saıası bastamalarǵa qatysyp otyratyndyqtaryn aıtty.
