Saılaý ashyq, demokratııalyq turǵyda ótti jáne azamattardyń óz erkin bildirý quqyǵy qamtamasyz etildi dep tolyq negizde málimdeımin-TMD Atqarý komıtetiniń tóraǵasy Sergeı Lebedev
ASTANA. 4 sáýir. QazAqparat - Búgin Memleket basshysy Nursultan Nazarbaev TMD Atqarý komıtetiniń tóraǵasy Sergeı Lebedevti qabyldady. Bul týraly QR Prezıdentiniń baspasóz qyzmeti málim etti.
Atqarý komıtetiniń tóraǵasy Nursultan Nazarbaevqa Dostastyq elderiniń mıssııasy baqylaýshylary jumysynyń qorytyndysy týraly habardar etti. Mıssııa quramyna TMD-nyń 9 elinen 426 adam engen.
- Jalpy, bizde prezıdenttik saılaýǵa daıyndyq jáne ótkizý barysy týraly óte jaǵymdy pikir qalyptasty. Ortalyq saılaý komıssııasynan bastap, ýchaskelik saılaý komıssııasyna deıin barlyq deńgeıde joǵary uıymdastyrýshylyq atap ótildi. Baıqaýshylar úshin barlyq jaǵdaı jasalǵan, qajetti qoldaý kórsetildi jáne materıaldarǵa qoljetimdilikke ıe boldyq.
Saılaý ashyq, demokratııalyq turǵyda ótti jáne azamattardyń óz erkin bildirý quqyǵy qamtamasyz etildi dep tolyq negizde málimdeımin, - dep atap ótti S.Lebedev jýrnalısterge arnalǵan brıfıng barysynda.
