Saılaý arqyly halyq órkendeý jolyn tańdaıdy - TTM PA Bas hatshysy

BAKÝ. QazAqparat - Qazaqstanda 9 maýsymda ótetin kezekten tys prezıdenttik saılaý - el tarıhynyń mańyzdy belesi bolary aıqyn. Eń aldymen, Qazaqstan Prezıdenti Qasym-Jomart Toqaevtyń qabyldaǵan sheshimi - Tuńǵysh Prezıdent Nursultan Nazarbaevtyń júrgizgen baǵdarynyń durystyǵyn aıǵaqtaıdy. Elde ótetin aldaǵy saılaýǵa qatysty QazAqparat agenttiginiń Ázerbaıjandaǵy tilshisine Túrki tildes memleketterdiń Parlamenttik Assambleıasy Bas hatshysy Altynbek Mamaıýsýpov osyndaı pikir bildirdi, dep habarlaıdy QazAqparat tilshisi.

«Bárimiz damyǵan ári baǵdary aıqyn Qazaqstandaǵy bıliktiń sabaqtastyǵyna kýá bolyp otyrmyz. Bul - Elbasy Nursultan Nazarbaevtyń basty eńbekteriniń biri ekenin erekshe atap ótý kerek», - deıdi Altynbek Mamaıýsýpov.

Parlamenttik assambleıa Bas hatshysy 9 maýsymda Qazaqstan halqy órkendeý jolyn tańdap, aımaqtaǵy beıbitshilik pen tynyshtyqqa qoldaý bildirerine senimdi.

«Óz tarapymnan qosarym: Túrki tildes memleketterdiń parlamenttik assambleıasy Qazaqstandaǵy saılaýǵa dástúrli túrde monıtorıng júrgizedi. Búginge deıin assambleıa músheleri ulttyq zańnama men halyqaralyq standarttarǵa saı demokratııalyq sharttar boıynsha ótip jatqan eldegi parlamenttik jáne prezıdenttik saılaýlardy baqylaǵan bolatyn. Osy joly da bizdiń uıym Qazaqstan Prezıdentin saılaýda baqylaýshylardan turatyn halyqaralyq mıssııany qurýǵa daıyn. Ol mıssııanyń ishine Ázerbaıjan, Qyrǵyzstan, Túrkııa elderi men Hatshylyq ókilderi enetin bolady», - deıdi spıker.

Avtory: Bekbaý Taımanov