Saılaý alqasy AQSh-taǵy prezıdenttik saılaýdyń qorytyndysyn rastady
ASTANA. KAZINFORM — Seısenbi kúni AQSh-tyń 50 shtatynyń astanalarynda saılaýshylar alqasy 2024 jylǵy prezıdenttik saılaýda saılanǵan prezıdent Donald Tramptyń vıtse-prezıdent Kamala Harrısti jeńgenin resmı túrde bekitti, dep habarlaıdy Kazinform tilshisi CBS News-ke silteme jasap.
AQSh Konstıtýtsııasynyń 12-shi túzetýine sáıkes, amerıkalyqtar saılaý kúni prezıdent pen vıtse-prezıdentti tańdaýdy qoldaýǵa ýáde beretin saılaýshylar alqasynyń tizimine tehnıkalyq túrde daýys beredi.
Osylaısha, saılaý kúnine qaraı árbir shtatta Demokratııalyq jáne Respýblıkalyq partııalar usynǵan saılaýshylardyń eki tizimi bolady. Saılanǵan soń, saılaýshylar AQSh prezıdenttigine kandıdatqa daýys beredi. Resmı turǵydan olar saılaýshylardyń erkine saı daýys berýi kerek, biraq mundaı talappen federaldy zań joq, tek kópshiliktiń erkine saı emes daýys bergeni úshin aıyppul (eń kóbi $ 1000) salynady. Sonymen qatar, barlyq derlik shtattarda saılaýshylar olardy taǵaıyndaǵan partııa aldynda jaýap beredi. Osy ýaqytqa deıin birde-bir saılaýshy basqa kandıdatqa daýys bergeni úshin jaýapqa tartylǵan joq.
Saılaý alqasy daýystarynyń sany 1964 jyldan beri 538 bolyp qaldy, biraq olardyń sany shtat boıynsha ózgerýi múmkin. 2020 jylǵy saılaý men 2024 jylǵy saılaý arasynda Tehas saılaýshylar alqasynyń eki daýysyn aldy, al bes shtat (Kolorado, Florıda, Montana, Soltústik Karolına jáne Oregon) árqaısysy sáıkesinshe bir saılaý daýysyna ıe boldy. Sáıkesinshe, jeti shtat árqaısysy bir saılaý daýysynan aıyryldy: Kalıfornııa, Illınoıs, Ogaıo, Mıchıgan, Nıý-Iork, Pensılvanııa jáne Batys Vırdjınııa.
48 shtat pen Kolýmbııa okrýginde (Vashıngton q.) «jeńimpazdyń barlyǵyn alý» júıesi bar. Sondyqtan shtattyń jalpy daýys berýiniń jeńimpazy shtattyń barlyq saılaý daýystaryn jeńedi. Oǵan kirmeıtinderi — shtat boıynsha jalpyhalyqtyq daýys berý negizinde saılaýshylardy anyqtaıtyn Men men Nebraska.
Nátıjesinde Donald Tramp saılaýshylar alqasynyń 312 daýysyn, al Kamala Harrıs — 226 daýys jınady. Saılaýshylar alqasy 538 adamnan turady jáne prezıdent bolyp saılaný úshin 270 daýystyń kópshiligi qajet. Ulttyq deńgeıde Donald Tramp 77,2 mln, al Kamala Harrıs 75 mln daýys jınady.
2025 jyldyń 6 qańtarynda Kongress saılaýshylar alqasynyń daýystaryn sanaý jáne saılaý jeńimpazyn jarııalaý úshin birlesken otyrysta jınalady.
Donald Tramp pen jańadan saılanǵan vıtse-prezıdent Djeı Dı Vens 2025 jyldyń 20 qańtarynda túste ant qabyldaıdy.
Buǵan deıin Time jýrnalynyń nusqasy boıynsha jyl adamy ataǵy AQSh-tyń jańadan saılanǵan prezıdenti Donald Trampqa buıyrǵanyn jazǵan bolatynbyz.